ასოცირების ხელშეკრულებას ხელს პრეზიდენტის მაგივრად პრემიერი ირაკლი ღარიბაშვილი მოაწერს ხელს, ამ გადაწყვეტილების შესახებ ”თბილისი თაიმს” მთავრობის და ოპოზიციის წარმომადგენლები, ასევე ექსპერტები ესაუბრნენ.
ვიქტორ დოლიძე, ევროპასთან ინტეგრაციის საპარლამენტო კომიტეტის თავმჯდომარე: ” ის ფაქტი, რომ ხელშეკრულებას პრემიერი მოაწერს ხელს, უკავშირდება ჩვეულებრივ პროცედურას, ამაში მართებულობას თუ არამართებულობას არ უნდა ვეძებდეთ, ეს არის მთავრობის პასუხისმგებლობა, მის მიერ შესასრულებელი და განსახორციელებელი სამუშაო გეგმა, გამომდინარე აქედა, მე თუ მკითხავთ არაფერი რევოლუციური ამაში არ არის, ეს არის ჩვეულებრივი პროცედურა, ჩემი აზრით ყველაფერი გეგმაზომიერად მიმდინარეობს და ეს გადაწყვეტილება არავითარ შემთხვევაში არ აყენებს პრეზიდენტის ინსტიტუტის იმიჯს ეჭვქვეშ, მე ამის მარტივ საფუძველსაც კი ვერ ვხედავ.”
დავით ზურაბიშვილი, რესპუბლიკური პარტიის წევრი: ”უკვე გაარკვიეს ერთმანეთში პრეზიდენტმა და პრემიერმა ეს საკითხი, იურიდიულად უფლებამოსილი შეიძლება ორივე პირი ყოფილიყო, ეს საკითხი უკვე გარკვეულია და ამაზე მსჯელობა ზედმეტია, კანონმდებლობაში ასე მკაფიოდ არ იყო განსაზღვრული ეს საკითხი, ამიტომ ჩვენი კანონმდებლობის თანახმად, პრეზიდენტსაც და პრემიერსაც შეეძლო მოეწერა ხელი ხელშეკრულებაზე, გადაწყვეტილება ლეგიტიმური იქნებოდა ორივე შემთხვევაში, უბრალოდ თვითონ ურთიერთობის.”
სერგო რატიანი, ნაციონალური მოძრაობის წევრი: ”ის რომ წლების განმავლობაში იყო გამალებული მუშაობა,საქართველომ მიაღწია ამ ვითარებას, იყო დამსახურება იმისა, რომ იყო მწყობრი გეგმა, შეთანხმებული პოლიტიკა და ა.შ. ის პოლიტიკური კინკლაობა, რასაც ჩვენ ვხედავთ, ქვეყნის იმიჯს ჩრდილს აყენებს. პრეზიდენტის მიმართ ხორციელდება აბსოლიტურად არაადეკვატური პოლიტიკა, ჩვენ უნდა ვაცნობიერებდეთ, რომ საქართველო იმყოფება არაორდინალურ ვითარებაში, როდესაც, ოლიგარქი მართავს ქვეყანას და მას შეუძლია მიუთითოს პრეზიდენტს და პრემიერს როგორ იმოქმედონ. ივანიშვილის ორივე პროექტი, როგორც მარგველაშვილის პრეზიდენტად წამოყენების, ასევე ღარიბაშვილის პრემიერად დანიშვნის, არის ჩავარდნილი პროექტი. ნათელი იყო, რომ მარგველაშვილს უნდა მოეწერა ხელშეკრულებაზე ხელი, თუმცა მან შედარებით სახელმწიფოებრივად იმოქმედა, არ გაამწვავა საკითხი და დაუთმო ღარიბაშვილს, ძნელად წარმომიდგენია რამდენხანს უნდა გაგრძელდეს ყოველივე ეს და როდემდე უნდა ითმინოს პრეზიდენტმა მთავრობის კაპრიზები და ინფანტიური გამოხტომები.”
გიორგი ახველდიანი, ქრისტიან დემოკრატიული პარტიის წევრი: ” ამ პრობლემაზე უმჯობესია იდარდონ და იფიქრონ ღარიბაშვილმა და მარგველშვილმა, ისეთი საბავშვო ბაღი აქვთ ატეხილი ამ საკითხთან დაკავშირებით და ისეთ სასაცილო მდგომარეობაში ჩაიგდეს თავი იმის გამო, რომ ერთმანეთს პატარა ბავშვებივით ეჯიბრებიან და არის ერთი დავი-დარაბა ვის აქვს კანონით მინიჭებული უფლება, კანონში კი გამოკვეთილად წერია, რომ საერთაშორისო ხელშეკრულებებს ქვეყნის სახელით ხელს აწერს საქართველოს პრეზიდენტი, ღარიბაშვილი კი იძახის, რომ არის კანონს რაღაც მიმართულებები ისეთი, რომ მას აძლევს ხელის მოწერის უფლებას. მას შემდეგ, რაც მარგველაშვილს ბიძინა ივანიშვილი გაუწყრა, „ქართული ოცნების“ ძალიან ბევრ მაღალჩინოსანს პირობა აქვს მიცემული ბატონ ბიძინა ივანიშვილისთვის, რომ მარგველაშვილი ძალიან მალე პრეზიდენტი აღარ იქნება, ეს თავად ბიძინა ივანიშვილის მოთხოვნაა, ჯერჯერობით არავინა არ საუბრობს, იმაზე თუ როგორ უნდა განხორციელდეს ეს იურიდიულად, პირადად მე გარწმუნებთ, რომ ძალიან სერიოზულად მუშაობენ ქართული ოცნების მაღალჩინოსნები, რომ ბიძინა ივანიშვილის გულის მოსაგებად მარგველაშვილი პრეზიდენტად აღარ იყოს. წაიყვანენ თუ არა მარგველაშვილს ასოცირების ხელშეკრულებაზე ხელის მოსაწერად ეს უკვე აღარ არის მნიშვნელოვანი, აღმოჩნდა, რომ ქვეყანას მართავს საბავშვო ბაღი, ისინი უკვე არაპროფესიონალიზმის მწვერვალზე არიან, რაც უამრავ მიმართულებაში ჩანს, მაგალითად იმაში თუ რა დღეშია ეკონომიკა, როგორ ჩატარდა არჩევნები და ა.შ. ვხედავთ, რომ ნაციონალურმა მოძრაობამ ეს ქვეყანა მიიყვანა უფსკრულამდე და ქართული ოცნება ძალიან დიდი შემართებით ცდილობს იმას, რომ ამ უფსკრულში გადაგვჩეხოს.”
კახა კოჟორიძე, ახალგაზრდა იურისტთა ასოციაციის თავმჟდომარე: ”საქართველოს კანონმდებლობით აბსოლიტურად ნათლად გადაწყვეტილი და განსაზღვრული არ არის ის თუ ვინ უნდა აწერდეს ასოცირების ხელშეკრულებას ხელს, ამიტომაც არის აზრთა სხვადასხვაობა ამ თემაზე, თუმცა ჩვენ უფრო ვიხრებით იმ აზრისკენ, რომ ამ ხელშეკრულებას ხელს უნდა აწერდეს ქვეყნის პრეზიდენტი, რადგანაც კანონმდებლობის თანახმად საერთაშორისო ხელშეკრულებებს პრეზიდენტი აწერს ხელს და გარდა ამისა, პრეზიდენტი არის სახელმწიფოს მეთაური, ასოცირების ხელშეკრულება კი აღმასრულებელი ხელისუფლების კომპეტენციას მისაკუთვნებელ საკითხს არ ეკუთვნის, ამიტომაც ამ ხელშეკრულებაზე ხელი უნდა მოეწერა ქვეყნის პრეზიდენტს, ვფიქრობ, მან კარგი გადაწყვეტილება მიიღო, როცა ერთჯერადად ხელმოწერის უფლება გადასცა პრემიერს.”
სოსო ცინცაძე, ექსპერტი პოლიტიკურ საკითხებში: ”ძალიან დიდი აჟიოტაჟი ატყდა იმაზე, თუ ვინ მოაწერდა ხელს ამ ხელშეკრულებას, თანაც ამ აჟიოტაჟში ჩაერთო ორი ბანაკი, ერთის მხრივ პრემიერ ღარიბაშვილის მომხრეები, მეორეს მხრივ კი პრეზიდენტ მარგველაშვილის და დაიწყო ეს ფარიკაობა, რაც იყო არასოლიდარული და არც ერთ მხარეს არ მატებს ღირსებას. არანაირი მნიშვნელობა არა აქვს თუ ვინ მოაწერს ასოცირების ხელშეკრულებას ხელს, ჩვენ უნდა მივეჩვიოთ იმას, რომ პრეზიდენტი აღარ არის ქვეყნის პირველი პირი, აამიტომ დოკუმენტს ხელს აწერს ქვეყნის ფაქტიური და არადეკლარირებული პირველი პირი, რაც ჩვეულებრივი ამბავია. ჯობს ჩვენ ყურადღება გავამახვილოთ იმაზე, თუ რას მოგვიტანს ეს ხელშეკრულება და არა იმაზე, თუ ვინ მოაწერს მას ხელს. ჯობდა არ ატეხილიყო ეს არაჯანსაღი აჟიოტაჟი, რომელმაც მხოლოდ ავნო ქვეყანას, ჩვენმა მეგობრებმაც და მტრებმაც გაიგეს იმის შესახებ თუ რა ვაიუშველებელი ატყდა იმაზე, თუ ვინ მოაწერდა ხელს ხელშეკრულებას, რომლის არსი მოსახლეობის 90%-მა არ იცის, უბრალოდ სასაცილოა ეს მდგომარეობა.
26.06.14
ნინა პირტახია