სომეხთა სამოციქულო ეკლესია იესო ქრისტეს შობისა და ნათლისღების დღესასწაულს ზეიმობს. ეკლესიის სწავლების მიხედვით: ძე ნათელს იღებდა, სულიწმიდა მტრედის სახით ჩანდა, ხოლო ციდან ისმოდა მამის ხმა: „ესე არს ძე ჩემი საყვარელი, რომელ მე სათნო ვიყავ”. (მათ. 3:17, მარკოზი 1:11, ლუკა 3:22). ამრიგად, მორწმუნეები ამ ორ მოვლენას ერთად, 6 იანვარს აღნიშნავს.
დილით აღევლინება წმინდა წირვა, რის შემდეგაც სრულდება წყალკურთხევა – იესოს ნათლისღება (ხალხური ტრადიციის მიხედვით, ჯვარს წყალში შთაფლავენ). იესომ წყალი აკურთხა მისი ნათლისღებით. ის, ვინც წირვას აღავლენს, წმიდა მირონს აწვეთებს წყალში და აკურთხებს მას. ტრადიციის თანახმად, ხალხს ნაკურთხი წყალი სახლში მიაქვს და სნეულთა სამკურნალო საშუალებად იყენებს. შემდეგ მღვდელი დადის მორწმუნეთა სახლებში, ახარებს მათ იესო ქრისტეს შობას. აქედან წარმოიშვა სახლის კურთხევის ტრადიციაც.
საქართველოს სომეხთა ეპარქიის წინამძღვარი შობა-ახალ წელს ულოცავს მრევლს, გასულ წელს ნაყოფიერად აფასებს და იმედს გამოთქვამს, რომ 2017 წელი იქნება „ჩვენი ტაძრების აღდგენის, სულიერი და კულტურული ცხოვრების გააქტიურების წელი“.
„თბილისი თაიმსი“ უცვლელად გთავაზობთ ეპისკოპოს ვაზგენ მირზახანიანის საახალწლო და საშობაო მილოცვას:
„გულწრფელად გილოცავთ ახალ წელსა და შობის ბრწყინვალე დღესასწაულს. ლოცვას აღვავლენ, რომ ყოვლისშემძლე ღმერთმა, ჩვენმა ზეციურმა მამამ დღეგრძელობა, სულიერი ბედნიერება და წარმატებები გიბოძოთ ყველას.
გასული, 2016 წელი, საქართველოს მორწმუნე სომეხთათვის იყო ნაყოფიერი წელი. ჩვენმა საზოგადოებრივმა და კულტურულმა დაწესებულებებმა მონაწილეობა მიიღეს სრულიად სომეხთა სხვადასხვა ფესტივალებსა და პროგრამებში. მომლოცველობებით საქართველოს სომხობამ გაიცნო სომხეთისა და არცახის ღისშესანიშნაობები, ქმედითი მონაწილეობა მიიღო საქართველოს სომეხთა ეპარქიის სხვადასხვა პროგრამებსა და ღონისძიებებში. ეპარქიის “ჰაიარტუნ“, “რაფაელ ჯავახ“, “ალექსანდრე მანთაშევ“ განათლების, კულტურისა და ახალგაზრდული ცენტრების საქმიანობის და საქართველოში მოქმედი სახელმწიფო, საზოგადოებრივი და სოციალური, კულტურული და საგანმანათლებლო დაწესებულებების გულმოდგინე მუშაობის შედეგად, შევინარჩუნეთ კულტურული გარემო, და საქართველოს სომხობა დატკბა ჩვენს შემოქმედთა თეატრის, კლასიკური მუსიკის, ხალხური სიმღერისა და ცეკვის, ლიტერატურისა და ხელოვნების სფეროს ქმნილებებით.
გაგრძელდა ეკლესიათმშენებლობა, განსაკუთრებით ჯავახეთში. ეპარქიის ეკლესიებში რეგულარულად სრულდებოდა ღვთისმსახურებები და საღმრთო ლიტურგიები, ჩვენმა სულიერმა მსახურებმა თავიანთი ერთგული საქმიანობით სახარებით ანუგეშეს და რწმენის ერთგულება შთააგონეს ჩვენს მორწმუნე ხალხს.
ძვირფასო დებო და ძმებო, დაე 2017 წელი ჩვენი მორწმუნე ერისათვის იყოს ახალი მიღწევებისა და წარმატებების წელი. ეს წელიც იქნება ჩვენი ტაძრების აღდგენის, სულიერი და კულტურული ცხოვრების გააქტიურების წელი. განსაკუთრებით მნიშვნელოვანი იქნება თუმანიანის „ვერნატუნის“ გახსნა დიდი პოეტის თბილისის სახლში, გაფართოვდება ბათუმის „ალექსანდრე მანთაშევის“ ცენტრის საშენობო პირობები და წინსვლის ახალი შესაძლებლობები შეიქმნება. წალკის რაიონში სამუშაოები ჩატარდება განათლების, კულტურისა და ახალგაზრდობის ცენტრის დაარსების მიმართულებით.
საქართველოს სომეხთა ეპარქია, ეფექტური სამუშაოებისა და თანამშრომლობისათვის, დღესასწაულთან დაკავშირებით ულოცავს და თავის სიყვარულს გადასცემს მთავარ საკათედრო წმინდა ეჯმიაწინს, საქართველოს მართლმადიდებელი ეკლესიის საპატრიარქოს, საქართველოსა და სომხეთის ხელისუფლებებს, „სურბ გევორგ“ ეკლესიის რეკონსტრუქციის ფონდის სამეურვეო საბჭოს, ფონდს “სომხეთის განვითარების ინიციატივები“ (IDEA), „ჯინიშიან“ ხსოვნის ფონდს, საქართველოსა და სომხეთში მოღვაწე რელიგიურ, სამთავრობო და არასამთავრობო დაწესებულებებს.
გვჯერა ჩვენი ხალხის შრომისმოყვარეობით შექმნილი ნათელი აწმყოსი და მომავლის. ჩვენ მისია გვაქვს მსოფლიოში და ჯერ კიდევ განუხორციელებელი ოცნებები.
საუკუნეების მანძილზე წმინდა შობის ბრწყინვალე დღესასწაული იმედისა და რწმენის წყაროა ჩვენი ხალხისთვის, რაც ახალი შემოქმედებისა და ხედვების წყაროა და სტიმული – ახალი მიღწევებისთვის.
დაე ბეთლემის წმინდა ბაგაში ხორცშესხმულმა ღმერთმა დალოცოს ჩვენი ქრისტეს მოყვარული და პატრიოტი ხალხი, მშვიდობიანად ამყოფოს სომხეთისა და საქართველოს ცა, გააძლიეროს სომხებისა და ქართველების ათასწლეულების მეგობრობა, მტკიცედ ამყოფოს სომეხთა სამოციქულო და ქართული მართლმადიდებელი ეკლესიების ქრისტიანული თანამშრომლობა, მორწმუნეთა სულიერი სიხარულისა და ოჯახური ბედნიერების სადიდებლად.
ქრისტე იშვა და მოგვევლინა უფალ ღმერთად, ჩვენ და თქვენ დიდი სიხარული!“
იესოს შობაზე სომხური ეკლესიის სწავლება ასეთია: „ამ დროისათვის გამოვიდა ავგუსტუსის ბრძანება, რომლის მიხედვითაც, მის მიწაზე და მათ შორის იუდეაშიც ხალხის აღწერა უნდა ჩატარებულიყო. ამ ბრძანების ძალით ყველა ისრაელიანი თავისი მშობლიური ქალაქისაკენ ისწრაფოდა, რათა სახელმწიფო აღწერაში მოხვედრილიყო. საოცარია ღვთაებრივი განგებულების საქმე! თავისი ამქვეყნიური დიდებით გაამაყებული კეისარი უფლის ნების ბრმა იარაღად გვევლინება, ღვთის განზრახვას ემსახურება. ქვეყნიური მეფის ნებამ მოუხმო იოსებსა და მარიამს ბეთლემისაკენ, რათა ზეციური მეუფის ნება აღსრულებულიყო. იოსები და მარიამი აუცილებლად უნდა წასულიყვნენ ბეთლემში – დავით მეფის სამშობლოში, სადაც სამეფო შტოს საგვარეულო ნუსხები ინახებოდა და სახელი იესოსი, რომლის წინაშეც ყოველთა ზეციურ ძალთა მუხლი იდრიკება, წარმართი ხელისუფალის ქვეშევრდომთა შორის ჩაწერილიყო. ბეთლემის ჩრდილოეთით, დავითის წყაროდან ორასიოდე ნაბიჯზე, კლდეებს შორის არის გამოქვაბული, რომელშიც ქარიშხლის და უამინდობის დროს მწყემსები პირუტყვთან ერთად თავს აფარებდნენ. გამოქვაბულის სიღრმეში ქვის კლდეში ამოკვეთილი ჩაღრმავება ცხოველებს ბაგის მაგივრობას უწევდა. ამ ღატაკურ გამოქვაბულში მოთავსდნენ წმინდა მგზავრები და სრულ სიწყნარესა და სიმშვიდეში იმყოფებოდნენ, ბრბოს მღელვარებასა და ქაოსს მოშორებულნი.
შუაღამის სიჩუმეში, მახლობლად, სოფელში მწყემსები იყვნენ. ანგელოზებმა პირველად სწორედ მათ ახარეს მხსნელის განკაცება: „ნუ გეშინინ, რამეთუ აჰა ესერა გახარებ თქუენ სიხარულსა დიდსა, რომელი იყოს ყოვლისა ერისა: რამეთუ იშვა დღეს თქუენდა მაცხოვარი, რომელ არს ქრისტე უფალი, ქალაქსა დავითისსა“ (ლკ. 2,10-11). მწყემსებმა გულითა და ჭეშმარიტი სარწმუნოებით თაყვანი სცეს ახალშობილ ჩვილს. შემდეგ აღმოსავლეთიდან მოვიდნენ მოგვები, რომელთაც ვარსკვლავი უძღვოდა და თაყვანი სცეს ჩვილს, საჩუქრები მისცეს და წავიდნენ თავიანთ ქვეყნებში.“
სოფიკო ნინიკაშვილი