საქართველოს ეკონომიკისა და მდგრადი განვითარების სამინისტროს შპს „მთის კურორტების განვითარების კომპანიის“ დირექტორის ალექსანდრე ონოფრიშვილის განცხადებით, დღეიდან ჩვეულ რეჟიმში განაახლებს მუშაობას დიდველის საბაგირო. ბორჯომის ხეობაში გაჩენილი ხანძრის შედეგად გამოწვეული დაკვამლიანება არ აღინიშნება, შესაბამისად, ბაკურიანში ტურისტული სეზონი ჩვეულ რეჟიმში გრძელდება.

ბორჯომის ხეობაში გაჩენილი ხანძრის ლოკალიზებაში ჩართულია  ბაკურიანის მთის მართვის დეპარტამენტი. ეს სამსახური 2 ღამის განმავლობაში მძიმე ტექნიკით ტყეში გზების გაჭრის სამუშაოებში მონაწილეობდა, რათა სახანძრო სამაშველო მანქანებს  ტყის ტერიტორიაზე  ცეცხლის ლოკალიზება და გადაადგილება შეძლებოდათ.

ცეცხლის ძირითადი კერები წაღვერის ტყეში და სოფელ დაბაში ლოკალიზებულია. ამ დროისთვის დარჩენილია რამდენიმე მცირე კერა.

გაზიარება