საქართველოს ჩემპიონატი მშვილდოსნობაში დაიწყო, რომელშიც პარასპორტსმენებიც მონაწილეობენ. დღეს, 22 დეკემბერს, პირველი ეტაპის შეხვედრები გაიმართა. შეჯიბრი 2 კატეგორიაში იმართება – 21 წლამდე ასაკისა და უფროსი სპორტსმენებისთვის ქალებსა და კაცებს შორის, 18-მეტრიან დისტანციაზე, დახურულ დარბაზში.

„მინდა აღვნიშნო, რომ საქართველოს ჩემპიონატზე ამდენი მონაწილე დიდი ხანია არ გვყოლია. 2018 წლის ბოლო ტურნირია და  როგორც ახალგაზრდები, ასევე უფროსი ასაკის სპორტსმენები მონაწილეობდნენ. დარწმუნებული ვარ, საქართველოს მომდევნო ჩემპიონატზე უფრო მეტი მონაწილე გვეყოლება. გაცნობებთ, რომ შემდეგი ტურნირი 2019 წლის იანვრის ბოლოს ჩატარდება, ქალაქ მარნეულში. იმ ჩემპიონატზე 4 საუკეთესო მშვილდოსანი შეირჩევა. ისინი შეკრებას გაივლიან და 2019 წლის თებერვალში მონაწილეობს მიიღებენ ევროპის ჩემპიონატზე, რომელიც თურქეთის ქალაქ სამსუნში ტარდება.“ – აცხადებს მშვილდოსნობის ფედერაციის პრეზიდენტი ხათუნა ნარიმანიძე.

ჩემპიონატის მეორე და საბოლოო ეტაპი 23 დეკემბერს გაიმართება და სწორედ ამ დღეს გამოვლინდებიან გამარჯვებულები. ტურნირი თბილისის პარასპორტის განვითარების ცენტრში იმართება.

გაზიარება