გ. ჩუბინაშვილის სახელობის ქართული ხელოვნების ისტორიისა და ძეგლთა დაცვის ეროვნული ცენტრი ახორციელებს საქართველოს კულტურისა და ძეგლთა დაცვის სამინისტროს მიერ დაფინანსებულ პროექტს: “რენე შმერლინგის ექსლიბრისის უნიკალური კოლექციის გამოფენა (XIX – XX ს.-ის 30 წწ.) და სადისკუსიო მრგვალი მაგიდა ქართული გრაფიკული ხელოვნების პრობლემებზე”.
პროექტის განხორციელებაში ასევე ჩართულია თბილისის სახელმწიფო სამხატვრო აკადემიაც, მისი პედაგოგები (გ. წერეთელი, ლ. შენგელია) და სტუდენტები.
ღონისძიება ეძღვნება ცნობილი გრაფიკოსი-მხატვრების ლადო გრიგოლიას და ნიკოლოზ ჩერნიშკოვის დაბადებიდან 110 წლისთავის საიუბილეო თარიღს.
გუშინ, ცენტრის საგამოფენო დარბაზში გაიმართა გამოფენა, სადაც წარმოდგენილი იქნა ამ ორგანიზაციის არქივში დაცული, დიდი ქართველი მეცნიერის, რენე შმერლინგის ექსლიბრისის კოლექცია, რომელიც მოიცავს ორ ასეულზე მეტ ქართული, სომხური, რუსული და ევროპული ექსლიბრისის საუკეთესო, უნიკალურ ნიმუშებს – XIXს-დან XXს-ის 30-ანი წლების ჩათვლით.
რადგან გამოფენა საიუბილეოა, გარდა ექსლიბრისებისა, ექსპოზიციაში განთავსდება ლ. გრიგოლიას შრიფტების რამდენიმე გარნიტური და ასევე ქ-ნი რენეს არქივში დაცული ნ. ჩერნიშკოვის მინიატურული და დაზგური გრავიურის ნიმუშები.
ამავე ღონისძიების ფარგლებში, გუშინ გაიმართება კონფერენცია და მოეწყობა შემეცნებითი-სადისკუსიო მრგვალი მაგიდა, რომლის მონაწილეებიც იქნებიან წამყვანი გრაფიკოსი მხატვრები, სტუდენტი ახალგაზრდობა და დაინტერესებული დამსწრე საზოგადოება.
მრგვალი მაგიდა დაეთმობა თანამედროვე ქართულ წიგნის გრაფიკაში, ბეჭდურ, კომპიუტერულ და მხატვრულ შრიფტში და ექსლიბრისის განვითარებაში არსებულ მწვავე, პრობლემატური საკითხების დასმას და მათი გადაჭრისთვის გზების ძიებას.
გამოფენა გაგრძელდება მიმდინარე წლის 30 ოქტომბრამდე.
17.10.13
