არჩევნების ჩატარების პასუხისმგებლობა არ არის მხოლოდ ერთი მხარის ვალდებულება. ყველა ჩართული მხარე თუ სრულყოფილად დაიცავს კანონს და ეთიკის ნორმებს, რომელიც საერთაშორისო სტანდარტებით არის აღიარებული და პოლიტიკური მიზნების გამო, რაიმე სხვა ტიპის ქმედებას არ გააკეთებს, ამ კანონმდებლობის პირობებში ძალიან კარგი, გამჭვირვალე და ევროპული სტანდარტის არჩევნების ჩატარება არის აბსოლუტურად შესაძლებელი, – ამის შესახებ ცესკო-ს თავმჯდომარემ თამარ ჟვანიამ ჟურნალისტებს განუცხადა. მისი თქმით, საარჩევნო კოდექსში ბევრი მნიშვნელოვანი ცვლილება შედის, თუმცა არის საკითხები, რომლებიც ამ ცვლილებებში ვერ მოხვდა.
როგორც ჟვანაიმ განაცხადა, საარჩევნო კოდექსში შესატანი ცვლილებებზე მუშაობის პროცეში ცესკო-ს ბევრი რეკომენდაცია იქნა გათვალისწინებული.
„ბევრი მნიშვნელოვანი ცვლილებაა საარჩევნო კანონმდებლობაში და შეუძლებელია იმის თქმა, რომ ეს არ არის მნიშვნელოვანი იმიტომ, რომ ეუთო/ოდირის რეკომენდაციებს ეფუძნება და ეს რეკომენდაციები მაქსიმალურად არის გათვალისწინებული. თუმცა არის საკითხები, რომლებიც ამ ცვლილებებში ვერ მოხვდა. ამაზე ჩვენმა საერთაშორისო პარტნიორებმაც გააკეთეს განცხადებები. მათ შორის, შეიძლება იყოს საკითხი, რომ მნიშვნელოვანია საარჩევნო ადმინისტრაციის დამკვირვებლების პროცესში მეტი გამჭვირვალობოს ელემენტების შემოტანა, ეს იყო ელჩის განცხადებაში. მინდა აღვნიშნო, რომ თავად საარჩევნო ადმინისტრაცია მაქსიმალურად ეცდება, რომ ეს პროცესი იყოს აბსოლუტურად გამჭვირვალე. შემოიტანოს დამატებითი გამჭვირვალობის ელემენტები, მათ შორის ჩვენ ვგეგმავთ წინასწარ გამოვაქვეყნოთ კონკურსანტთა სია და პროცესი იყოს ყველასთვის ხელმისაწვდომი.
გამჭვირვალობოს გარანტიები ნამდვილად არსებობს, კანონი არის მაქსიმალურად მოწესრიგებული იმისთვის, რომ ჩატარდეს კარგი არჩევნები. მე პირდაპირ ვიტყვი, რომ არჩევნების ჩატარების პასუხისმგებლობა არ არის მხოლოდ ერთი მხარის ვალდებულება, ყველა ჩართული მხარე თუ სრულყოფილად დაიცავს კანონს და ეთიკის ნორმებს, რომელიც საერთაშორისო სტანდარტებით არის აღიარებული და პოლიტიკური მიზნების გამო, რაიმე სხვა ტიპის ქმედებას არ გააკეთებს, ამ კანონმდებლობის პირობებში ძალიან კარგი, გამჭვირვალე და ევროპული სტანდარტის არჩევნების ჩატარება არის აბსოლუტურად შესაძლებელი”,- განაცხადა თამარ ჟვანიამ.
