საქართველოს მასშტაბით აღსაზრდელების დიდი ნაწილი საბავშვო ბაღებს დაუბრუნდა. ცხადია, ბავშვებს ახალ მოცემულობებთან უწევთ შეგუება – ბუნებრივია, ეს მათთვის საკმაოდ რთულია, რადგან აბსოლუტურად განსხვავებული რეალობის წინაშე აღმოჩნდნენ.
ვის აქვს ვალდებულებები, რომ საბავშვო ბაღებში წესრიგი და ჰიგიენა დაცული იყოს? საკითხის ირგვლივ “თბილისი თაიმსს” ინფექციონისტი, მაია ბუწაშვილი ესაუბრა.
“რა რეგულაციებიც საბავშვო ბაღებს აქვს დაწესებული, კარგია და ადეკვატური. თუმცა, რამდენად სრულდება ისინი დაწესებულებების მიერ, ამის თქმა ძალიან რთულია”, – აღნიშნავს ბუწაშვილი.
ინფექციონისტი ჩვენთან საუბრისას განმარტავს, თუ რა პასუხისმგებლობები აქვთ პედაგოგებს, მშობლებსა და რის უნარი აქვთ, ამ შემთხვევაში, აღსაზრდელებს. როგორც ბუწაშვილი განმარტავს, შეუძლებელია, ბავშვმა რაიმე რეგულაცია გაიაზროს და დაიცვას ის.
“ბავშვი ვერ დაიცავს ვერანაირ რეგულაციას. აქ საუბარია იმაზე, რომ თვითონ დაწესებულებების შიგნით დაიცვან ისინი სწორად პედაგოგებმა, დამლაგებლებმა. ბავშვებს არც პირბადე მოეთხოვებათ. მნიშვნელოვანია დალაგების წესების დაცვა. თუმცა, ყველაზე მთავარი მაინც არის მშობლების როლი, რომ ბაღში არ გაუშვან სიცხიანი ბავშვი, ბაღის როლი კი არის ის, რომ ბავშვს ჩაუტარდეს ტემპერატურის კონტროლი, რა თქმა უნდა, სრული გარანტია აქაც ვერ იქნება. უსიმპტომო შემთხვევებიც არსებობს, თუმცა, გარკვეულწილად, ტემპერატურის გაზომვით ვირუსის არსებობისა და გადადების რისკი მცირდება”, – ამბობს ინფექციონისტი, მაია ბუწაშვილი.
მასალა მოამზადა : მარიამ ტიელიძემ
