“ჩვენ ვთავაზობთ ადამიანებს, გულით ატარონ ნებისმიერი სიტყვა, აზრი თუ იდეოლოგია” – “ვუდთინსი”

ახალი წლის მაგიური დღეები ნელ-ნელა გვიახლოვდება. დღევანდელი რეალობიდან გამომდინარე, ჩვენ ვცდილობთ, საზეიმო განწყობა შევიქმნათ და მომავალ წელს ხალისით შევეგებოთ. სწორედ ამაზე ზრუნავს “ვუდთინსი” – საინტერესო, სახალისო, ორიგინალური ნამუშევრებით ის შესაძლებლობას იძლევა, ჩვენ თან ვატაროთ საკუთარი თავი, გემოვნება.

რას გვთავაზობს ბრენდი საახალწლოდ?  თამთა მოსიაშვილი, “ვუდთინსის” თანადამფუძნებელი “თბილისი თაიმსს’ ესაუბრა.

ნამუშევრებს რის მიხედვით ქმნით?

უკვე მეორე წელი დაიწყო, რაც ჩვენი ბრენდი – “ვუდთინსი” არსებობს. ვამზადებთ ხისა და ორგანული მინისგან აქსესუარებს: გულსაბნევებს, საყურეებსა და სამაჯურებს. ბრენდის ქვეშ, ძირითადად, აქცენტირებულია გულსაბნევები. ჯერ კიდევ მაშინ, როდესაც ეს თემა ყველასთვის ასოცირდებოდა ბრჭყვიალა აქსესუართან, რომელიც მხოლოდ ჩვენი ბებიების თაობას ეკუთვნოდა, შევეცადეთ, ეს მიდგომა შეგვეცვალა და ეს აქსესუარი გაგვეხადა ადამიანების თვითგამოხატვის ერთერთი მნიშვნელოვანი დეტალი. საკმაოდ დიდი მუშაობა დაგვჭირდა,  მივსულიყავით იმ ეტაპამდე, რომ საზოგადოებას მიეღო და შეეყვარებინა ჩვენი პროდუქტი.

ჩვენი თითოეული  აქსესუარი ასოცირდება ამა თუ იმ ადამიანის ხასიათთან, ემოციებსა და ინტერესებთან. “ვუდთინსი” არის ბრენდი, რომელიც ადამიანების იდენტობას უსვამს ხაზს და ეხმარება მათ თვითგამოხატვაში. ამიტომ, ჩვენ ვთავაზობთ ადამიანებს, გულით ატარონ ნებისმიერი სიტყვა, აზრი თუ იდეოლოგია. ჩვენს თითოეულ გულსაბნევს, რომელიც დაახლოებით მოიცავს 500-მდე დიზაინს, ერთი იდეა აერთიანებთ, ისინი ჰყვებიან პატარა ისტორიას მის მფლობელზე.

დიზაინს თავად მომხმარებელი ირჩევს?

დავიწყებ იმით, რომ მომხმარებლის აზრი ყველაზე მნიშვნელოვანია ნებისმიერი ბიზნესის განვითარებისთვის. ჩვენ ყოველთვის ვუსმენთ მათ. ვამზადებთ ინდივიდურ შეკვეთებს და ვითვალისწინებთ ძალიან ბევრ რჩევას. ჩვენს კოლექციაში შეგიძლიათ, იხილოთ ბევრი დიზაინი, რომელიც სწორედ ჩვენი მომხმარებლების ინიციატივითა და გემოვნებით შევქმენით. ჩვენი ბრენდის მიზანიც სწორედ ეს არის – ვიყოთ ძალიან ახლოს “ვუდთინსის” ერთგულ მომხმარებლებთან.

ახალ წელთან დაკავშირებით რა გეგმები გაქვთ?

ახალი წელი “ვუდთინსისთვის” საკმაოდ დატვირთული პერიოდია. ამ დროს მოგეხსენებათ, საკმაოდ დიდი შრომა გვიწევს როგორც კორპორატიულ შეკვეთებზე, ასევე – ახალი წლის კოლექციის შექმნაზე და ასე შემდეგ.

საკმაოდ სასიამოვნოა ის ფაქტი,  რომ უკვე მეორე წელია, ჩვენი მომხმარებელები საყვარელ ადამიანებისთვის სწორედ ჩვენს აქსესუარებს ირჩევენ საჩუქრად.

ამასთან, ახალ წელს ვგეგმავთ ძალიან ბევრ სიახლესა და სიურპრიზს ჩვენი საყვარელი მომხმარებლებისთვის. წინ ნამდვილად ბევრი ჯადოსნობა გელით.

მასალა მოამზადა : მარიამ ტიელიძემ