ქრისტიანულ სამყაროში ნიკოლოზობა წელიწადში ორჯერ აღინიშნება: 19 დეკემბერი – წმ.ნიკოლოზ სასწაულთმოქმედის ხსენების დღეა, 22 მაისი კი- სასწაულთმოქმედის წმინდა ნაწილების მირონიდან ქ. ბარში გადასვენების დღე.
წმ. ნიკოლოზის ცხოვრება სასწაულებით იყო აღსავსე. მას ბევრი ადამიანი უხსნია ხორციელი თუ სულიერი სიკვდილისაგან. მართლმადიდებლები წმინდა მღველთმთავარს ყოველგვარი გასაჭირის ჟამს მიმართავენ ხოლმე.
წმინდანი საქართველოს მართლმადიდებელი ეკლესიის მფარველად მას შემდეგ ითვლება, რაც საქართველოს კათალიკოს-პატრიარქმა წმინდანს ქართული ეკლესია შეავედრა.
მისი ცხოვრებიდან ერთ-ერთი ეპიზოდი თითქმის ყველასთვისაა ცნობილი. ისტორია მოგვითხრობს: როცა წმინდანი ქ. პატრაში მსახურობდა, შეიტყო, რომ ერთ გაღატაკებულ კაცს, რომელსაც სამი ქალიშვილი ჰყავდა, მათი გამზითვება და დაქორწინება არ შეეძლო, განუზრახავს მათი საროსკიპოში გაგზავნა. უფალმა ქალწულების გამოსახსნელად წმინდა ნიკოლოზი გაგზავნა. სამგზის მისულა წმინდანი მათთან და კართან ოქროთი სავსე ქისა დაუტოვებია. ასე შეძლო მამამ სამივე ქალიშვილის გამზითვება. სწორედ ამ ისტორიიდან მკვიდრდება დასავლურ კულტურაში სანტა- კლაუსი. იგი დღესდღეობით ევროპისა და ჩრდ. ამერიკის შობა-ახალი წლის სიმბოლოა.
ევროპის ზოგიერთ ქვეყანაში შობა ღამეს წინდებსა და ფეხსაცმელს საგანგებოდ ტოვებენ ბუხართან, რადგან სწამთ, რომ საკვამურიდან სახლში სანტა კლაუსი ან მისი თანაშემწე შეაღწევს, თუმცა აქვე უნდა აღინიშნოს ის ფაქტიც, რომ თანამედროვე ბავშვების ცნობიერებაში წმ.ნიკოლოზი სანტა-კლაუსს არანაირად არ უკავშირდება.
ქართველ ხალხში წმინდანი დიდი სიყვარულითა და პატივისცემით სარგებლობს. მის სახელზე საქართველოს მასშტაბით აგებულია არაერთი ტაძარი.
წმ.ნიკოლოზი ღრმად მოხუცებულობის ჟამს მიებარა უფალს. მისი წმინდა ნაწილები იტალიაში, ქალაქ ბარში ინახება.
წმ. ნიკოლოზის ტროპარი: “კანონად სარწმუნოებისა და ხატად სიმშვიდისა, და მოძღვრად მარხვისა გყო შენ ქრისტემან, სამწყსოსა შენისათვის ჭეშმარიტებით, ამისთვისცა მოიგე სიმდაბლითა სიმაღლე და სიგლახაკითა სიმდიდრე, წმიდაო მღვდელთმთავარო ნიკოლოზ, ევედრე ქრისტესა ღმერთსა შეწყალებად სულთა ჩვენთათვის.”
მასალა მოამზადა : თორნიკე ყრუაშვილმა
