„მე არ დამიმალავს, რომ ბევრი ხარვეზი გვქონდა და გვაქვს; ამაში ჩემი პირადი პასუხისმგებლობაც საკმაოდ დიდია, ამას არ გავურბივარ, არც გავექცევი, მაგრამ ყველაფერი შედარებითია“, – ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ tv “პირველზე“, ინგა გრიგოლიას გადაცემა „რეაქციაში“ იმ კითხვის საპასუხოდ განაცხადა, რომელიც პანდემიის მართვის ხარისხს შეეხებოდა.
„საქართველო, ჯერჯერობით, განვითარებადი ეკონომიკის ქვეყანაა… ეს პანდემია ხომ ის არაა, შარშან წითელას აფეთქება რომ გვქონდა და ქვეყანაში 7-8 ათასი შემთხვევა იყო ან კიდევ სხვა მსგავსი აფეთქებები?! პანდემია არის საუკუნეში ერთხელ. მან შეაზანზარა უძლიერესი ქვეყნები. აშშ-ში 18-19 მლნ ადამიანია ინფიცირებული. კოვიდმა შეაზანზარა იტალია და დიდი ბრიტანეთი, სადაც ყველაზე გამართული ჯანდაცვის სისტემა აქვთ. ჩვენ უნდა ვაღიაროთ, რომ განვითარებადი ეკონომიკის ქვეყნა ვართ“, – აცხადებს ამირან გამყრელიძე.
NCDC-ის ხელმძღვანელის შეფასებით, რომ არა მარტ-აპრილ-მაისში მკაცრი შეზღუდვები, რომლის დროსაც საქართველომ მოსამზადებლად დრო მოიგო, ჯანდაცვის სისტემა ყოველდღიურად ათასობით შემთხვევას ვერ გაუძლებდა.
„ჩვენ რომ ამ ტიპის ზეწოლა გვქონოდა გაზაფხულზე და ამის შანსი არსებობდა, ჯანდაცვის სისტემა 2-3 კვირა, ყოველდღიურად, ათასობით შემთხვევას ვერ გაუძლებდა“, – აღნიშნა მან.
რაც შეეხება სამომავლო პროგნოზებს, ქვეყნის მთავარი ეპიდემიოლოგის თქმით, ინფიცირების რიცხვის შემცირება შეზღუდვების შენარჩუნებასა და რეგულაციების მაქსიმალურად დაცვაზეა დამოკიდებული.
„თუ ახლა, ამ ერთ კვირაში ძალიან არ გავილაღებთ, არ შევამსუბუქებთ ყველფერს, მაშინ დარწმუნებული იყავით, რომ იანვრის ბოლოს ინფიცირების დღიური მაჩვენებელი 1000-ზე ნაკლები გვექნება… 1000-ს ჩამოვცილდებით, ხოლო აპრილისთვის ერთ ან ორ ასეულზე ჩამოვალთ“, – განაცხადა ამირან გამყრელიძემ.
