ქართულ მართლმადიდებელ ეკლესიაში სასწაულმოქმედი ხატებზე არაერთი ისტორია არსებობს.
სასწაულმოქმედ ხატებს შორისაა „ჯიხეთის ღვთისმშობელი“, რომლის ისტორიაც საქართველოსთან, კონკრეტულად კი ,გურიასთანაა დაკავშირებული.
მეოცე საუკუნის დამდეგს ყოვლაწმინდა ღვთისმშობელმა თავისი ივერიის ხატის ასლი გურიასაც მიჰმადლა. ათონის მთაზე მოღვაწე ქართველმა, იოანე ღმრთისმეტყველის სავანის წინამძღვარმა, მღვდელმონაზონმა იონამ, ათონელ ბერებს სპეციალურად გურიის ჯიხეთის დედათა მონასტრისთვის დააწერინა ივერიის ღვთისმშობლის ხატის ასლი და საჩუქრად გადასცა დედათა სავანეს.
აღსანიშნავია ის ფაქტი, რომ ხატი შემკულია მამა იონას დაკვეთით შესრულებული წარწერით: „ განგებითა ღმრთისათა, და წამისყოფითა დედისა ღმრთისათა, მე მონა მისი მღვდელმონაზონი იონამ, ამჟამად მყოფი ათონის მთაწმინდის ქართველთა წმიდა იოანე მახარებლის სავანის გამგემან, დავახატინე წმიდა ხატი ესე სახელწოდებით სასწაულმოქმედი დედა ღმრთისას ივერიის და შევსწირე გურიის ჯიხეთის დედათა სავანესა.. 1905 წელსა 1 აგვისტოსა“
გურიის ჯიხეთის დედათა მონასტერს არაერთი მომლოცველი სტუმრობს და სწორედ „ჯიხეთის ღვთისმშობლის“ წინაშე ლოცვით არაერთი მორწმუნე განკურნებულა და სასწაულებრივად ასრულებია მრავალი ნატვრა.
მასალა მოამზადა: თორნიკე ყრუაშვილმა.
