მოულოდნელი სიხარულის ხატის გამოსახულება ასეთია: ოთახში ზემოთ მოთავსებულია ღვთისმშობლის ხატი, ქვემოთ კი მის წინაშე მუხლმოყრილია მლოცველი ახალგაზრდა. ამ ხატის მადლმოსილი ძალა ისტორიის თანახმად ასეთია:
ეს ხატი იმყოფებოდა ერთი ცოდვილის ხელში, ის არ ღალატობდა ჩვეულებას და ყოველდღიურად მის წინაშე მთავარანგელოზის სიტყვებით ლოცულობდა: „ გიხაროდენ, სიხარულევანო“. ერთხელ საშინელი უსჯულოების ჩასადებას რომ მიდიოდა, ღვთისმშობლის ხატისკენ მიბრუნდა, რათა წასვლამდე მის წინაშე ელოცა და თავზარი დაეცა. მან დაინახა, რომ ხატი ადგილზე იძვროდა. ღვთისმშობელი და მის ხელში ყრმა გაცოცხლებულიყვნენ: ყრმა ღმერთს ხელებს, ფეხებზე და ფერდზე ჭრილობები გახსნოდა და სისხლი ნაკადულად ჩამოსდიოდა- ისევე, როგორც ჯვარზე ვნებისას.
როდესაც ამ კაცმა ყოველივე ეს იხილა, შიშით შეჰღაღადა: “ჰოი, დედოფალო, ვინ ჩაიდინა ეს?” ღვთისმშობელმა უპასუხა: “შენ და სხვა ცოდვილები, ვითარცა იუდეველები, ჯვარს აცვამთ ძეს ჩემსას”. “შემიწყალე მე, დედაო მოწყალეო!” – აღმოხდა ცოდვილს. ღვთისმშობელმა უპასუხა: “მოწყალე დედას მიწოდებ მე და მწუხარებით კი აღმავსებ”. მაშინ უბედურმა უთხრა: “არა, დედოფალო, ნუ გარდაემატება ცოდვა ჩემი გულმოწყალებასა შენსა, რამეთუ შენ ხარ სასო ყოველთა ცოდვილთა, ევედრე ძესა შენსა და მამასა ჩემსა”. მაშინ უფროსად კურთხეულმა დედამ ღვთის წინაშე აღავლინა ლოცვა: “ძეო და ღმერთო ჩემო, ჩემდა მომართ სიყვარულითა შეიწყალე ცოდვილი ესე და შეუნდე ყოველივე ბოროტნი საქმენი მისნი”. ხილვა ამგვარად დამთავრდა. ღვთაებრივმა ხმამ ცოდვილს სინანული აღუძრა და მას მოულოდნელი სიხარული მიენიჭა ღვთისმშობლის ხატისაგან, რომელმაც იგი დაღუპვისაგან იხსნა.
თბილისში “მოულოდნელი სიხარულის” ხატის ასლი წმიდა იოანე ღვთისმეტყველის სახელობის რუსულ ეკლესიაშია დაბრძანებული.
ხატის დღესასწაული ყოველთა წიდათა კვირასა და ახალი სტილით 22 დეკემბერს აღესრულება.
მასალა მოამზადა: თორნიკე ყრუაშვილმა
