ასე თუ ისე, ჩვენ ყოველდღიურად ვაგროვებთ ემოციებს, შეგრძნებებს, რომლებიც ერთობლიობაში ქმნის ისტორიასა და წარსულს. ასევე, ჩვენ გვსურს, ვფლობდეფ სუვენირებს, რომლებსაც აქვს შინაარსი და ასოცირდება ჩვენთვის მნიშვნელოვან მოცემულობებთან. „ქართული ყუთი“ ყველა იმ ამბავსა და ნივთს მოიცავს, რომელიც საქართველოს შვილისთვის საინტერესოა. დეტალებზე „თბილისი თაიმსს“ ალექსანდრე მერკვილიშვილი ესაუბრა.
რა იდეის მატარებელია „ქართული ყუთი“?
„ქართული ყუთი“ არის ინოვაციური პროდუქტი, რომლის მიზანიც ჩვენი ქვეყნის კულტურულ-საგანმანათლებლო ძეგლებისა და ღირშესანიშნაობების პოპულარიზაციაა. ყუთის იდეა 6 თვის წინ დაიბადა. მის ფორმირება-ხორცხშესხმას გარკვეული დრო დასჭირდა და უკვე 2020 წლის დეკემბერში პირველი ნაბიჯები გადავდგით. მიუხედავად პანდემიის პირობებისა, მაინც შევძელით, საზოგადოებისთვის გაგვეზიარებინა ჩვენი პროდუქტი.
ძირითადად, რა ნივთებს მოიცავს ყუთი?
კვადრატული ფორმის ხის ყუთი, რომელიც გრავირებულია ქართული თემატიკის სხვადასხვა სიმბოლოთი, სავსეა სუვენირებითა და ხელნაკეთი ნივთებით. ასევე ყუთში აღმოაჩენთ ახალგაზრდა ხელოვანების მიერ შექმნილ, თანამდეროვე ხელოვნების ნიმუშებს, რომლებიც შექმნილია ქვეყნის სხვადასხვა კუთხის კულტურული სიმდიდრეების ინსპირაციით. ეს ხელს შეუწყობს ახალგაზრდა ხელოვანების რეალიზაციას და ფართო საზოგადოებისთვის გაცნობას. ერთობლიობაში, პროდუქტი ქმნის საქართველოს. ადამიანი, რომელსაც სურვილი აქვს, უკეთ გაიცნოს ქვეყანა, შეიძენს ყუთს, რომელშიც აღმოაჩენს ულამაზეს სუვენირებს, შესაბამისი მოკლე და საინტერესო აღწერებილობებით, სხვადასხვა ენაზე. დაკვირვების მიხედვით, ტურისტების დიდი ნაწილი სუვენირს მხოლოდ ვიზუალიდან გამომდინარე არჩევს, ისე, რომ ნივთის შესახებ ინფორმაცია სრულად არ აქვს. სწორედ ამიტომ, ყუთში მოთავსებული ყველა ნივთის აღწერა, მომხმარებელს მოკლედ და საინტერესოდ გააცნობს, თუ რა მნიშვნელობის არის ესა თუ ის ნივთი ქართული კულტურისთვის. რაც მთავარია, ულამაზესად გრავირებული ყუთი თვითონვე გახდება ერთ-ერთი მთავარი სუვენირი, მას შემდეგ რაც მომხმარებელი მის მთლიანობას დაშლის, კვადრატი გადაიქცევა 5 ულამაზეს სურათად (ყუთის გვერდები).
ვისზეა გათვლილი ის?
პროდუქცია გათვლილია როგორც ტურისტულ სეგმენტზე, ასევე, საქართველოს მოსახლეობაზე. ყუთი იდეალური პროდუქტი იქნება ასევე სკოლის მოსწავლეებისა და სტუდენტებისთვის, რომლებსაც სურთ, უკეთ გაიცნონ ჩვენი ქვეყანა. მათთვის ჩვენი პროდუქტი სპეციალური ფასდაკლებით იქნება ხელმისაწვდომი. ქართველი ემიგრანტებისთვის, ქართული ყუთი, რომელშიც მთელი საქართველო არის ჩატეული, ნოსტალგიის შეგრძნების ერთგვარი შემსუბუქება იქნება.
სამომავლოდ რას გეგმავს „ქართული ყუთი“?
ჩვენ ყოველ დღე ვმუშაობთ, იმისთვის, რომ პროდუქტს მეტი მრავალფეროვნება შევძინოთ და მეტად საინტერესო გავხადოთ. მოცემულ მომენტში ჩვენს მიზანს საზოგადოებისთვის თავის გაცნობა წარმოადგენს.
მასალა მოამზადა : მარიამ ტიელიძემ
