შინაური ცხოველები ადამიანების საუკეთესო მეგობრები რომ არიან, ამაზე ყოველდღიურად ბევრს ვისმენთ. ასე თუ ისე, ჩვენ ვცდილობთ, მათ მიმართ ყურადღება გამოვიჩინოთ და ვიზრუნოთ. ზოგიერთს ეს მეტად შეუძლია და აქვს სურვილი და რესურსი, მეტი გააკეთოს შინაური ცხოველების კეთილდღეობისთვის.
„ფეთსაც“ დაარსების იდეაც სწორედ აქედან მომდინარეობს. მისი გუნდი ამზადებს კომფორტულ სახლებს მათთვის, ვინც ჩვენთვის განსაკუთრებულია.
შალვა ოთანაძე, „ფეთსას“ დამფუძნებელი “თბილისი თაიმსს” ესაუბრა.
რა მიზეზების გამო გაგიჩნათ იდეა, გეწარმოებინათ ეკოლოგიურად სუფთა, ხის სახლები შინაური ცხოველებისთვის?
ალბათ, ყველა დამეთანხმება, რომ შინაური ცხოველები ადამიანებს ბევრად უფრო კეთილებსა და მოსიყვარულეებს გვხდიან. ვისაც სახლში ოთხფეხა მეგობარი ჰყავს, მათთვის ძალიან კარგადაა ნაცნობი ის სიხარული და გამორჩეული ბედნიერება, რომელსაც ისინი ჩვენ გვანიჭებენ. ყოველი მათგანი კარგად გრძნობს, თუ როგორი სასიამოვნოა ოთხფეხა მეგობართან ურთიერთობა, მათთან დროის გატარება და მათი მოვლა.
ოთხფეხა მეგობარი პირველად 5 თვის წინ ავიყვანეთ ოჯახში. ჩემს დისშვილს ავუხდინეთ ოცნება და პატარა ლეკვი ვაჩუქეთ. ტომასთან ურთიერთობისას თანდათან ვრწმუნდებოდი იმაში, რომ შინაური ცხოველის ყოლა მხოლოდ მასთან გატარებულ დროსა და თამაშს არ ნიშნავდა. ისინი ჩვენგან განსაკუთრებულ ყურადღებას, ზრუნვასა და უსაფრთხო საცხოვრებელი პირობების შექმნას საჭიროებენ. სხვა ალტერნატივებისგან განსხვავებით, მინდოდა, ჰქონოდა ისეთი სახლი, რომელშიც მაქსიმალურად კომფორტულად იგრძნობდა თავს, აუცილებლად იქნებოდა ეკოლოგიურად სუფთა და მაქსიმალურად მოუხდებოდა ჩვენი საცხოვრებელი სახლის ინტერიერსაც. რამდენიმე დღეში ჩემივე ხელით ხისგან გავუკეთე სახლი – ნუ ეს იყო უფრო სასახლე, ვიდრე – სახლი. სწორედ იმ დღიდან იმდენად შეიცვალა ტომასის ქცევა უკეთესობისკენ, იმდენად გამოსწორდა მისი ჰიგიენური პირობები, რომ მაშინვე მივხვდი, ყველა შინაური ოთხფეხა ცხოველი და მათი მეპატრონე იმსახურებს მსგავს პირობებს.
სწორედ ასე დაიბადა ,,ფეთსას,, შექმნის იდეა, რომელიც, შეიძლება ითქვას, ტომასის დამსახურებაა.
რა დეტალები გაითვალისწინეთ მისი დამზადებისას?
პროდუქტის შემუშავებისას საკმაოდ მრავალი მნიშვნელოვანი ფაქტორის გავითვალისწინება მოგვიხდა. დიზაინისა და პროტოტიპირების პროცესში, პირველ ყოვლისა, ვითვალისწინებდით შინაური ცხოველის საჭიროებებს, ასევე, დიდი ყურადღება დავუთმეთ მეპატრონის საცხოვრებელ პირობებთან თავსებადობასა და კომფორტს. საბოლოოდ, მივიღეთ პროდუქტი, რომელიც იდეალურია შიდა გამოყენებისათვის, ადვილად იწმინდება, არის ჰიგიენური და 100% ეკოლოგიურად სუფთა (დამზადებულია ბუნებრივი ფიჭვის ხისგან), დახრილი სახურავის დიზაინი და იატაკიდან აწეული პანელი ცხოველს უნარჩუნებს სიმშრალეს, ჰაეროვნებას და თავიდან აცილებს ნესტს, ასევე, იცავს მას სხვადასხვა მწერისგან, უკეთესი ჰაერის ნაკადისა და დამატებითი კომფორტისთვის ჩაშენებული აქვს გვერდითი ფანჯარა, საცხოვრებელი ასევე მოიცავს აივანსა და გვერდით კიბეს.
რამდენად მოთხოვნადია ეს პროდუქტი?
თამამად შეიძლება, ითქვას, რომ აღნიშნულ პროდუქტზე მოთხოვნა საკმაოდ მაღალია როგორც ადგილობრივ, ასევე – გლობალურ ბაზრებზე. სტატისტიკურ მონაცემებზე დაყრდნობით, მთელს მსოფლიოში 471 მილიონი ძაღლი და 373 მილიონი კატა იზრდება ოჯახში. რაღა თქმა უნდა, ამ რიცხვებს პირდაპირ არ ვუკავშირებთ ჩვენ პოტენციურ მომხმარებელთა რიცხვს. თუმცა, აღნიშნულ პოპულაციაში საკმაოდ დიდი რიცხვია იმ ადამიანების, რომლებიც განსაკუთრებულად ზრუნავენ საკუთარ ოთხფეხა მეგობრებზე, მათ კომფორტზე, ჯანმრთელობაზე, უსაფრთხოებაზე და სურთ, რომ თავიანთ მეგობრებსაც ჰქონდეთ განსაკუთრებული საცხოვრებელი პირობები.
ვფიქრობ მათ საცხოვრებელ პირობებში მნიშვნელოვან კომფორტს და დამატებით ღირებულებას შექმნის „ფეთსა“.
როდის იგეგმება მისი რეალიზება?
პროდუქტის სარეალიზაციოდ ჩაშვება იგეგმება 10 მარტიდან. აღნიშნული პერიოდიდან ჩვენ მომხმარებლებს შეეძლებათ, თავიანთი საყვარელი ოთხფეხა მეგობრებისთვის შეიძინონ როგორც მზა პროდუქცია, ასევე, მათი ინდივიდური საცხოვრებელი პირობებისა და შინაური ცხოველის საჭიროებებიდან გამომდინარე, შეგვიკვეთონ მათზე მორგებული დიზაინისა და სპეციფიკაციის პროდუქტი. ამ ეტაპზე გაყიდვები სოციალური ქსელების მეშვეობით იქნება, უახლოეს მომავალში კი ვიქნებით წარმოდგენილი სხვადასხვა ლოკაციაზე, ძირითადად – შინაური ცხოველების მაღაზიებში.
მასალა მოამზადა : მარიამ ტიელიძემ
