ლუკა სიჭინავა 20 წლისაა. ამ ეტაპზე, ის სახელმწიფო სამედიცინო უნივერსიტეტის მეორე კურსის სტუდენტია. პირველი კურსიდან მოყოლებული, მუშაობს სხვადასხვა კლინიკაში. გასული წლის ოქტომბრის თვიდან კი ლუკამ კოვიდ სივრცეში გადაინაცვლა.
საზოგადოებისთვის საინტერესო ის კოვიდის დროს ბავშვებთან გადაღებული ფოტოებით გახდა.
იმ პერიოდში, გადაბმულად, ერთკვირიან მორიგეობებზე იმყოფებოდა კლინიკა „კიდკო“-ში – რა თქმა უნდა, ბავშვებთან. დღემდე მას ბევრ მათგანთან აქვს ურთიერთობა, ბევრიც სოციალური ქსელით ცდილობს მასთან დაკონტაქტებას.
როგორც ლუკა ამბობს, კოვიდდადასტურებული ბავშვებისთვის შექმნილი გარემო ასე გამოიყურებოდა – სათამაშოები, ნახატები, კუბიკები, ფერადი ფანქრები… ყველა ცდილობდა, მათ დახმარებოდა და ავად ყოფნის პერიოდი შეემსუბუქებინა. ყველა ერთად თამაშობდა. პანდემიის პერიოდში ბავშვები ერთმანეთს და სამედიცინო პერსონალს ძალიან შეეჩვივნენ – რის გამოც გამოჯანმრთელების შემდეგ იქაურობის დატოვება უჭირდათ.
როგორც ლუკა ჩვენთან საუბრისას აღნიშნავს, ბევრ ბავშვთან კონტაქტი დღემდე შენარჩუნებულია და კლინიკასაც კარგი შეფასება აქვს. ამ რეჟიმში ლუკამ 2 თვის განმავლობაში იმუშავა. ამბობს, რომ ბავშვების უმეტესობამ კორონავირუსი ძალიან მარტივად გადაიტანა – მათ ვირუსზე გაიმარჯვეს.
„პედიატრიული კლინიკა „კიდკო“ გარკვეული პერიოდის განმავლობაში იყო კოვიდმიმღები. თავიდანვე ვიყავით გათვითცნობიერებულები, რომ ბავშვებთან უნდა გვემუშავა, გვეთამაშა, გაგვერთო… ამავდროულად, სამუშაო იყო ძალიან რთული, რადგან ვირუსს კარგად არ ვიცნობდით. შეფუთულები ვიყავით და ისე ვატარებდით დროს ბავშვებთან ერთად“, – უყვება „თბილისი თაიმსს“ ლუკა სიჭინავა.
მასალა მოამზადა : მარიამ ტიელიძემ
