თოვლის მოსვლა ძალიან ბევრი ადამიანისთვის არის სასიხარულო. სხვადასხვა კონტინენტზე, სხვადასხვა ქვეყანაში აუცილებლად ვნახავთ ადამიანებს, რომლებისთვისთვის თოვა გამორჩეულად სასიამოვნო საყურებელია. თუმცა, ყველა სახელმწიფოსთვის მისი ხილვა თანაბრად შესაძლებელი არ არის. მეტიც, ზოგან ათეულობით წელი გასულა ფიფქების გარეშე, ზოგან კი საერთოდაც არასდროს თოვს.
ასე, მაგალითად, ავსტრალიაში მოსახლეობას ყოველ ჯერზე გაუჭირდება, გაიხსენოს, ბოლოს როდის მოთოვა კონტინენტზე. 2020 წლის აგვისტოს შუა რიცხვებში აქ მოთოვა – მხოლოს შვიდი ათეული წლის შემდეგ. ცხადია, აქაურები ბევრად განსხვავებულ კლიმატს არიან შეჩვეულები. ეს ფაქტი კი მათთვის უდიდესი სიურპრიზი აღმოჩნდა.
ზუსტად ერთი წლის წინ – 2020 წლის თებერვალში მოთოვა ერაყის დედაქალაქ ბაღდადში. ამ მოვლენით გახარებულები, ბავშვები სასწრაფოდ თოვლში სათამაშოდ გაიქცნენ. დიდებმა და პატარებმა სამახსოვრო ფოტოები გადაიღეს, სანამ დიდი ხნის, ათეულობით წლის შემდეგ ციდან ფიფქები მათ ქვეყანაში კიდევ წამოვა. დედაქალაქისთვის, ქვეყნის სხვა ტერიტორიებისგან განსხვავებით, თოვა დამახასიათებელი არ არის.
2018 წელს გავრცელდა ინფორმაცია, რომ მსოფლიოში ყველაზე დიდი ქვიშიანი უდაბნო, საჰარა მთლიანად თოვლმა დაფარა. უდაბნოში წვიმაც კი იშვიათად მოდის. სწორედ ამიტომ დაიმსახურა ფაქტმა მსოფლიოს ინტერესი – ფოტოგრაფებმა გადაწყვიტეს, შანსი ხელიდან არ გაეშვათ და ულამაზესი კადრები დააფიქსირეს.
2013 წლით თარიღდება თოვლის მოსვლა ახლო აღმოსავლეთში. მოვლენამ ქვეყნები მთლიანად გადაათეთრა. შედეგად, სატრანსპორტო მოძრაობა და ელექტრო კავშირი სრულად პარალიზდა. მიუხედავად ამხელა დისკომფორტისა, დიდი თუ პატარა, ყველა ხალისობდა და გუნდაობისგან სიამოვნებას იღებდა.
რა ვითარებაა დღეს? ამერიკის შეერთებული შტატების შემთხვევა მთელი მსოფლიოსთვის გახდა ცნობილი – ფაქტი ტეხასის შტატს უკავშირდება. წელს აღნიშნულ შტატში ყველაზე დაბალი ტემპერატურა დაფიქსირდა. ამას დაემატა ის, რომ ტეხასის მოსახლეობის თითქმის ნახევრისთვის ელექტროენერგია ხელმიუწვდომელი გახდა. შედეგად, არაერთი ადამიანი გარდაიცვალა.
მასალა მოამზადა : მარიამ ტიელიძემ
