სოციალური საწარმოს – 7R-ის დამფუძნებლის, მარი ბენდელიანისა და დიზაინერ ეკატერინე გეგუჩაძის ინიციატივით, აფხაზური ქსოვილის ელემენტები ძველი, უკვე გამოუყენებელი ნაჭრებისგან შეკერილ ტანსაცმელში კვლავ გაცოცხლდება. აფხაზეთიდან დევნილმა ამ ორმა ადამიანმა გადაწყვიტა, სწორედ აფხაზეთს დაუკავშიროს საკუთარი ჩვენება, რომელიც სულ მალე ანაკლიაში გაიმართება.
უფრო დეტალურად, საკითხის შესახებ „თბილისი თაიმსს“ მარი ბენდელიანი ესაუბრა.
„ჩვენ მოვიფიქრეთ ასეთი რაღაც – ძველი ნაჭრებისგან, ტანსაცმლისგან შეგვეკერა ახალი, ტრენდული, პრაქტიკული ტანსაცმელი, რომელსაც ექნება ტრადიციული ელემენტები. ამ შემთხვევაში, ჩვენს მიზანს წარმოადგენს ქსოვილზე აფხაზური ორნამენტებისა და დეტალების გადმოტანა.
ტანსაცმელი იქნება თანამედროვე, გაფორმებული ძველი ტრადიციული ელემენტებით – იმის საფუძველზე, რაც შემონახულია სხვადასხვა ფრესკიდან და ა.შ“, – ამბობს მარი.
ის დიზაინერ ეკატერინე გეგუჩაძის, ასევე,დიზაინერისა და სოციალური საწარმოს – 7R -ის თანამშრომლობის შესახებაც საუბრობს.
„ეს ადამიანი არის ტექსტილის დიზაინერი. მუშაობს ამ მიმართუებით, აქვს ცოდნა, გამოცდილება, საკუთარი სახელოსნო და ეს იქნება, ასე ვთქვათ, კოლაბორაცია.
საერთო მიზანი გახლავთ, როგორც უკვე აღვნიშნე, თანამედროვე ტანსაცმლის შექმნა ტრადიციული ელემენტებით. ეკატერინეს მიზანია, ჩვენს საწარმოს დაეხმაროს მდგრადობაში.
მონაწილეები იქნებიან, უმეტესად, აფხაზეთიდან დევნილები – როგორც მკერავები, ისე – მოდელები. ჩვენება იქნება ანაკლიაში. მოლაპარაკებები გვაქვს როგორც კერძო, ისე – საჯარო სექტორთან. დარწმუნებულები ვართ, მხარდაჭერას მოვიპოვებთ“, – აღნიშნავს მარი ბენდელიანი „თბილისი თაიმსთან“ საუბრისას.
მასალა მოამზადა : მარიამ ტიელიძემ
