დღევანდელ ქართულ ბაზარზე შოკოლადს არაერთი კომპანია გვთავაზობს. უზომოდ დიდია მოთხოვნაც. თუმცა, მომხმარებლებს იზიდავთ ის პროდუქტი, რომელიც განსხვავებულია. spacebox-ის შოკოლადი სხვებისგან ჯადოსნური დიზაინით გამოირჩევა – ეს არის ვიზუალი, რომელიც სტაბილურად არის დაკავშირებული კოსმოსთან.
ჯერ მხოლოდ სამი თვეა, რაც ის არსებობს. მცირე ბიუჯეტის ფონზე, მის გამოჩენას საკმაოდ დიდი გამოხმაურება მოჰყვა. დამფუძნებელი ანუკა კაკაბაძე გახლავთ. ხოლო თანადამფუძნებელი – ნუცა კირთაძე.
“თბილისი თაიმსს” დეტალებზე სწორედ ანუკა კაკაბაძე ესაუბრა.
დიზაინი აშკარად გამორჩეულია. საიდან გაჩნდა იდეა?
მსგავსი დიზაინი იაპონიაში არსებობს. ძალიან მინდოდა, გასაგებია, რომ არსებობს ძალიან ბევრი შოკოლადი, თუმცა, დიზაინზე მაინცდამაინც ბევრს არ ფიქრობენ. ეს არ მომწონდა. ამიტომ, მსგავსი მეთოდი საქართველოშიც გადმოვიტანეთ. დავაკორექტირეთ, შევქმენით… რადგან ყუთი ასეთი ხარისხიანია, გაჩნდა სურვილი, სამახსოვროც ყოფილიყო იმ კუთხით, რომ ბოლოს მისი გადაგდების სურვილი არავის ჰქონოდა.
რა შესთავაზეთ, დამატებით, მომხმარებელს?
ყუთს მივეცით კიდევ ერთი დატვირთვა – რაზეც შოკოლადებია მოთავსებული, შესაძლებელია შემდეგ უკვე ამ შიგთავსის ამოღება, სადაც ფსკერზე წერია – “შეინახე მოგონებები”. ბაზარზე რომ შემოვდიოდით, ვიცოდით, რომ სასაჩუქრე მიმართულებით უფრო იქნებოდა ჩვენი პროდუქცია.
ასევე, ვაყოლებთ ბარათებს – ეს არის ჩვენ მიერ შექმნილი ლუსტრაციები. თვეში ერთხელ მათი დატვირთვა იცვლება. ესეც იმისთვის, რომ ბევრი ფიქრი არ მოუწიოს ადამიანს საჩუქრის შეძენისას.
მომხმარებელს შეუძლია, გადააწყდეს კონვერტებს, რომლებიც საკმაოდ არაორდინალურია. ისინი დაშტამპულია ფერადი ცვილით – პლანეტა სატურნის შტამპით, რამაც ძალიან დიდი გამოხმაურება მოიპოვა. ისინი დღესასწაულებთან დაკავშირებით შემოვიტანეთ.
თვითონ შოკოლადზე რას გვეტყვით?
ამჯერად, შოკოლადი არის ყავისფერი ფერის. თავდაპირველად, ბაზარზე შემოვედით ფერადი შოკოლადებით. შემდეგ გადავწყვიტეთ, რომ შოკოლადის შეფუთვა ყოფილიყო ფერადი. ის არის შავი შოკოლადი, არ არის მწარე და გახლავთ ხელნაკეთი.
მასალა მოამზადა : მარიამ ტიელიძემ
