საქართველოში პოლიტიკური რეალობა კვლავ დაძაბულია. „ერთიანი ნაციონალური მოძრაობის“ ლიდერის, ნიკა მელიას ირგვლივ არსებული გარემოებები აზრთა სხვადასხვაობასა და ცხარე დისკუსიებს იწვევს. პარტიის თავმჯდომარე სასჯელაღსრულების დაწესებულებიდან გამოსვლის სხვადასხვა პირობას ასახელებს, ოპოზიციური პარტიების წარმომადგენლები კი კვლავ მიიჩნევენ, რომ მელია პოლიტპატიმარია.
აღნიშნულ საკითხს „თბილისი თაიმსთან“ საუბრისას ანალიტიკოსი, ზაალ ანჯაფარიძე აფასებს. როგორც ის მიიჩნევს, ნიკა მელიას თანაგუნდელები ცდილობენ, ენმ-ის ლიდერი წარმოაჩინონ, როგორც გმირი.
„უკვე ძალიან რთულია ლოგიკის პოვნა. რასაც მე ვაკვირდები და შემიძლია, ანალიზი გავაკეთო მისი და მისი პარტიის მიერ გაკეთებული განცხადებების შედეგად, მათ ყველანაირად სურთ, ნიკა მელია ციხიდან გამოვიდეს, როგორც გმირი და, როგორც თავად აცხადებენ, „მორალურად გამარჯვებული“. ამაში რა იგულისხმება, ალბათ, მხოლოდ მათ იციან. ამას ემსახურება ნიკა მელიას ჭირვეულობა, რომ გათავისუფლების ხან ერთ მეთოდს უარყოფს, ხან – მეორეს.
ის თამაშობს. ცდილობს, საკუთარი თავისთვის რაც შეიძლება მომგებიანი პოლიტიკური დივიდენდები ამოიღოს ამ ყველაფრიდან“, – აცხადებს ანალიტიკოსი.
როგორც ის აღნიშნავს, დაკავებამდე ნიკა მელიას მიმართ საზოგადოების საკმაო ნაწილი სიმპათიებით იყო განმსჭვალული.
„მისი დაკავების მომენტში ნიკა მელია საზოგადოების თვალში იყო ლიდერი. საზოგადოება მის მიმართ სიმპათიებით იყო განმსჭვალული. ახლა უკვე, რაც მან დაიწყო თამაშები, გარკვეულწილად, მის მიმართ საზოგადოების განწყობები შეიცვალა. მისი პარტიის წარმომადგენლები ცდილობენ, ნიკა მელიას დაუბრუნონ პოლიტიკური წონა და პოლიტიკური იმიჯი.
მე ვფიქრობ, მისი სასამართლოს გადადებაც სწორედ ამას ემსახურება. რომ კიდევ ერთხელ სცადონ, რაღაცნაირად, პარლამენტში „ქართული ოცნება“ დაითანხმონ, რომ მიიღონ ამნისტიის ის კანონი, რაც შედის ოპოზიციის ინტერესში“, – განაცხადა ზაალ ანჯაფარიძემ „თბილისი თაიმსთან“ საუბრისას.
მასალა მოამზადა : მარიამ ტიელიძემ
