სულ მალე მოსახლეობა დედაქალაქის მერს აირჩევს. მმართველმა პარტიამ კანდიდატად მოქმედი მერი, კახა კალაძე წარადგინა. ოპოზიციის ნაწილმა კი მერობის კანდიდატად ნიკანორ მელია, ხოლო საკრებულოს თავმჯდომარეობის კანდიდატად ელენე ხოშტარია დაასახელა.
შესაბამის პროგნოზს “თბილისი თაიმსთან” საუბრისას ანალიტიკოსი, ზაალ ანჯაფარიძე აკეთებს.
“მოგეხსენებათ, ზუსტი რეიტინგები განისაზღვრება კლასიკური სოციოლოგიური მეთოდებით. თუმცა, ჩემი აზრით, იქედან გამომდინარე, თუ რა ნეგატიური აურა ახლავს თან თბილისის მოსახლეობის უმრავლესობაში ნიკანორ მელიასა და ელენე ხოშტარიას პერსონებს, მათი ბოლოდროინდელი აქტივობებიდან გამომდინარე, ვფიქრობ, ამ არჩევნებზე მათი შანსები არ არის მაღალი. ამას დავუმატოთ ისიც, რომ მხოლოდ სამმა პოლიტიკურმა პარტიამ დაუჭირა მხარი ამ წყვილს – შეიძლება, “ნაციონალურ მოძრაობასთან” დაკავშირებული კიდევ ორი-სამი პარტია მიემატოს, მაგრამ ეს სურათს არ შეცვლის, რადგან მათი მთავარი მიზანი, რომ მელია წარმოჩენილი ყოფილიყო, როგორც მთლიანი ოპოზიციის ერთიანი კანდიდატი, რაც ამას, როგორც კანდიდატს უფრო მეტ ლეგიტიმაზიასა და წონას მიანიჭებდა, არ გამოვიდა. არ გამოვიდა ძალიან გასაგები მიზეზების გამო – როგორც ჩანს, პარტიებმა, რომლებიც “ნაცმოძრაობასთან” ერთად ისხდნენ ფანჩატურში, საღად აწონ-დაწონეს პოლიტიკური კონიუნქტურა და მიხვდნენ, რომ მათი ასეთი ღია კავშირი ენმ-სთან არ იქნებოდა მათთვის პოლიტიკურად მომგებიანი”, – განმარტავს ანჯაფარიძე.
ანალიტიკოსის შეფასებით, სავარაუდოდ, ოპოზიცია რამდენიმე კანდიდატს დაასახელებს.
“აქედან გამომდინარე, მე ვფიქრობ, რომ შედეგი იქნება ასეთი – სავარაუდოდ, ოპოზიცია წამოაყენებს რამდენიმე კანდიდატს. ეს გამოიწვევს იმას, რომ ოპოზიციური ელექტორატის ხმები დაიფანტება. ეს წყალს “ქართული ოცნების” წისქვილზე დაასხამს. იმ შემთხვევაშიც კი, თუ გახარიას პარტია დააყენებს მერობის საკუთარ კანდიდატს, მე არ მგონია, რომ ეს კანდიდატი კალაძეს კონკურენციას გაუწევს.
ყოველ შემთხვევაში, დღევანდელი გადმოსახედიდან, თუ ხელისუფლება 2 ოქტომბრამდე ფატალურ შეცდომებს არ დაუშვებს, “ქართული ოცნების
კანდიდატი გაიმარჯვებს. ხვალ ან ზეგ რომ იყოს თბილისის მერობის არჩევნები, აუცილებლად კალაძე მოიგებდა”, – განმარტა ზაალ ანჯაფარიძემ “თბილისი თაიმსთან” საუბრისას.
მასალა მოამზადა : მარიამ ტიელიძემ
