აუცრელობის შემთხვევაში ესენციური ჯგუფებისთვის კოვიდტესტირება ფასიანი იქნება – ამის შესახებ განცხადება საკოორდინაციო საბჭოს დასრულების შემდეგ დაავადებათა კონტროლის ეროვნული ცენტრის ხელმძღვანელმა გააკეთა.
მისი თქმით, წინადადება წარდგენილია და ძალაში სავარაუდოდ 15 სექტემბრიდან შევა.
ამირან გამყრელიძის ინფორმაციით, სახელმწიფო მხოლოდ აცრილი მოქალაქების უსასყიდლოდ დატესტვას გააგრძელებს, სხვა შემთხვევაში კი ხარჯის გაღება ინდივიდუალურ პირებს ამ მათ დამსაქმებლებს მოუწევთ. მისი თქმით, სახელმწიფო ვაქცინაციას მათ უფასოდ სთავაზობს და თუ არ იცრებიან, მაშინ “კეთილი ინებონ” და ტესტირება თავად უზრუნველყონ, რადგან ეს სახელმწიფოსთვის საკმაოდ დიდი ხარჯია.
„ესენციური ჯგუფები არიან ჩემი კოლეგები, მაგრამ ჩემს კოლეგებზე ალბათ გამონაკლისი იქნება ვინაიდან ისინი მაინც წინა ხაზზე არიან. ასევე სხვადასხვა მოლების, მაღაზიების თანამშრომლები, მასწავლებლების გარკვეული ჯგუფები, პოლიციის გარკვეული ჯგუფები რომლებიც გარკვეული პერიოდულობით იტესტებიან, დიდია ეს ჩამონათვალი, ჩვენ მათ ვთავაზობთ რომ აიცრან ორჯერ, მაშინ სახელმწიფო გააგრძელებს მათ ტესტირებას და თუ არ აიცრებიან, მაშინ მათ გარკვეული პერიოდს შემდეგ მოუწევთ, რომ თვითონ, ან დამსაქმებლებმა გადაიხადონ ტესტირების თანხა“ – განაცხადა გამყრელიძემ.
კორონავირუსით გამოწვეულ ინფექციაზე სავალდებულო ტესტირებას დაქვემდებარებულ პრიორიტეტულ პირთა ნუსხისა და ჩატარების წესი მთავრობამ 2020 წლის 15 ივნისს დაამტკიცა:
– სავალდებულო ტესტირებას დაქვემდებარებულ პრიორიტეტულ პირთა ნუსხაშია ნებისმიერ სამედიცინო დაწესებულებაში მოხვედრილი პაციენტი პნევმონიის დიაგნოზით ან ცხელებით მიმდინარე შემთხვევა;
– სამედიცინო პერსონალი;
– საბაჟო-გამშვებ და სასაზღვრო პუნქტებში, აგრეთვე გაფორმების ეკონომიკურ ზონებში დასაქმებული პირები, მათ შორის, სამედიცინო და ეპიდემიოლოგიური სამსახურების წარმომადგენლები
– სამხედრო სავალდებულო და საკონტრაქტო (პროფესიულ) სამხედრო სამსახურში გასაწვევი და აქტიურ რეზერვში მისაღები პირები
– სპეციალური პენიტენციური სამსახურის თანამშრომლები რომლებსაც უშუალო შეხება აქვთ ბრალდებულებთან/მსჯავრდებულებთან;
– სურსათის ეროვნული სააგენტოს ის თანამშრომლები, რომლებსაც შეხება აქვთ საერთაშორისო სატვირთო გადაზიდვების განმახორციელებელ ავტოსატრანსპორტო საშუალებების მძღოლებსა და ექსპედიტორებთან…და ა.შ.
