„მოხატული“ – დახვეწილი და სასარგებლო ნივთები ჩვენს ყოველდღიურობაში

ბევრ ჩვენგანს სურს, თან ატარებდეს კულტურას, ხელოვნებას – იმას, რაც საკუთარ გემოვნებასა და ხასიათს შეესაბამება. „მოხატული“ ასეთ სურვილებს ასრულებს. ხარისხიანად და პროფესიონალურად შესრულებული ნამუშევრები ქმნის არა მხოლოდ ერთი ადამიანის, არამედ – მის გარშემომყოფების განწყობას.

კონკრეტულად, რას ქმნის „მოხატული“ და როგორ იქმნება პროდუქტი – „თბილისი თაიმსს“ ხატია ცქიტიშვილი ესაუბრა.

დეტალურად რომ გვითხრათ, რის მოხატვას ითვალისწინებს თქვენი საქმიანობა?

ლამაზი და სასარგებლო – ეს იყო ჩემი საქმიანობის მიზანი. ვინაიდან, გარდა შემოქმედებითი ბუნებისა, ჩემი პროდუქტი უნდა ყოფილიყო გამოყენებადი და მოთხოვნადი საზოგადოებისთვის, გადავწყვიტე, ცნობილი მხატვრების, ჩვენთვის ყველაზე საყვარელი ნახატებით მომეხატა კედები, რის შემდეგაც მოვხატე ქურთუკები და მუსიკალური ინსტრუმენტები, როგორიცაა ყველასათვის საყვარელი უკულელე და გიტარა.

დიზაინი, იდეები ვის ეკუთვნის?

,,მოხატულის“ შექმნის იდეა ეკუთვნის ,,ჩემი უკულელეს“ დამფუძნებელს, ვისთან ერთადაც დავიწყეთ დიზაინების შემუშავება, დახვეწა და ,,გაცოცხლება“. ნახატები იხატება უშუალოდ ჩემ მიერ.

ნამუშევრებს რა მასალით ქმნით?

ტანის სამოსსა და ფეხსაცმელზე ნახატები სრულდება სპეციალური, ნაჭრისა და ტყავისთვის განკუთვნილი ტექსტილის საღებავებით და მუსიკალურ ინსტრუმენტებზე – აკრილის საღებავებით. ნივთის მოხატვამდე ხდება მისი დამუშავება სპეციალური გრუნტით, რათა ნახატი იყოს გამძლე და ინარჩუნებდეს ეფექტურობას დროის დიდ მონაკვეთზე, ხოლო უკვე დასრულებული კომპოზიცია იფარება დამცავი ლაქის საშუალებით.

საქართველოს ნებისმიერი კუთხეშია ისინი ხელმისაწვდომი?

რა თქმა უნდა. საქართველოში მყოფ ნებისმიერ პირს შეუძლია, შეუკვეთოს მისთვის სასურველი პროდუქტი და ჩვენ მას გავუგზავნით.

მასალა მოამზადა : მარიამ ტიელიძემ