“ეს განმუხურის სანაპიროა. აქ ერთ წელიწადში გემი-ბიბლიოთეკა მოეწყობა” – ამის შესახებ ეროვნული ბიბლიოთეკის დირექტორმა, გიორგი კეკელიძემ სოციალურ ქსელში დაწერა და შესაბამისი ფოტო გამოაქვეყნა.
დეტალების გასარკვევად “თბილისი თაიმსი” თავად კეკელიძეს დაუკავშირდა. როგორც მან აღნიშნა, აღნიშნული იდეა ადგილობრივი ბიბლიოთეკის თანამშრომლებსა და ხელმძღვანელს ეკუთვნით.
“ეს გახლავთ ადგილობრივი ბიბლიოთეკის თანამშრომლებისა და ხელმძღვანლის იდეა, რომლის გენერალური მხარდამჭერიც არის ეროვნული ბიბლიოთეკა. ერთობლივი ძალებით ვცდილობთ, რომ შევქმნათ სივრცე, რომელიც იგულისხმებს ორიგინალურ ფრთაშესხმას წიგნიერების პოპულარიზაციისა სწორედ იმ ადგილას, სადაც ალბათ, ამას ყველაზე მეტად სჭირდება ხაზგასმა. გემიც სიმბოლურია, რადგან, რეალურად, ის გემი, რომელიც ნაპირზე დგას, ალბათ ყველაზე მეტად მოძრავი გემი იქნება სიმბოლური დატვირთვით”, – ამბობს კეკელიძე.
როგორც ეროვნული ბიბლიოთეკის დირექტორი განმარტავს, გათვალისწინებულია ორი ძირითადი სივრცე.
“აქ იქნება ორი ძირითადი სივრცე. ეს გახლავთ გემბანი სამკითხველო-სადისკუსიო სივრცე, ასევე, კარცერ-ლუქს კაიუტები. ბუნებრივია, პატარა გემია და, შესაბამსიად, სივრცეები შედარებით მცირეა, მაგრამ სრულიად საკმარისი იმისთვის, რომ, დიდ წილად საზაფხულო, მაგრამ წელიწადის ყველა დროის შესაბამისი ბიბლიოთეკა მოეწყოს”, – აღნიშნავს გიორგი კეკელიძე.
როგორც ის იმედოვნებს, გემი-ბიბლიოთეკა უკვე მომავალ ზაფხულს გაიხსნება.
მასალა მოამზადა : მარიამ ტიელიძემ
