2 ოქტომბრის თვითმმართველობის არჩევნებამდე სულ უფრო მცირე დრო რჩება და დაძაბულობაც კიდევ უფრო იმატებს. მნიშვნელოვანია აღვნიშნოთ ის ფაქტი, რომ თვითმმართველობის არჩევნები ოპოზიციისთვის ერთგვარ რეფერენდუმს წარმოადგენს. თვითმმართველობის ამგვარი აღქმა ოპოზიციის მხრიდან განპირობებულია 19 აპრილის შეთანხმებით, რომლის თანახმადაც თუკი „ქართული ოცნება“ ამ არჩევნებში 43%-ს ვერ აიღებდა, მაშინ რიგგარეშე საპარლამენტო არჩევნები დაინიშნებოდა.
ორივე მხარისთვის 2 ოქტომბრის არჩევნებს მართლაც ჰქონდა ეს დატვირთვა, ვიდრე რამდენიმე კვირის წინ, მმართველმა პარტიამ ეს შეთანხმება ერთი ხელის მოსმით არ გააუქმა. „ქართული ოცნების“ წამყვანი პირები დღემდე მკაფიოდ აცხადებენ, რომ რიგგარეშე საპარლამენტო არჩევნები არცერთ შემთხვევაში არ ჩატარდება, მიუხედავად იმისა, რა პროცენტული მაჩვენებელიც არ უნდა აიღოს მან თვითმმართველობის არჩევნებზე.
განსხვავებულს ამტკიცებს ოპოზიცია, თითქმის ყველა ძირითადი ოპოზიციური პარტია აქტიურ განცხადებებს აკეთებს იმასთან დაკავშირებით, რომ „ქართულ ოცნებას“ აუცილებლად მოუწევს რიგგარეშე საპარლამენტო არჩევნების დანიშვნას, ვინაიდან მათ სხვა ალტერნატივა არ ექნება. მსგავსი შინაარსის განცხადებებით, განსაკუთრებით გამოირჩევა მთავარი ოპოზიციური პარტიი, ენმ-ს ლიდერი, ნიკა მელია.
რთულია, ერთი შეხედვით, დღევანდელი ვითარებით განვსაზღვროთ დაინიშნება თუ არა რიგგარეშე არჩევნები. ექსპერტების მოსაზრებით, ეს ერთგვარად არჩევნების შედეგზეც იქნება დამოკიდებული. თუმცა, მეტად სავარაუდოა ის ფაქტი, რომ რეფერენდუმად ქცეულ არჩევნებს ოპოზიცია მაქსიმალურად მოუფრთხილდება და ეცდება თითოეული ხმა მაქსიმალურად დაიცვას.
მასალა მოამზადა: თორნიკე ყრუაშვილმა
