დღევანდელ გლობალურ სამყაროში ტექნოლოგიები და სოციალური მედია პოლიტიკურ დღის წესრიგს ქმნის. ინტერნეტი და სოციალური მედია ქართული პოლიტიკური პარტიებისთვისა და სუბიექტებისთვის უნიკალური შესაძლებლობაა თავიანთი ვიდეორგოლებით, მიმართვებითა თუ სხვადასხვა სახის აქტივობებით მიიზიდონ ნებისმიერი სეგმენტის ამომრჩეველი და დააინტერესონ ისინი. ქართული პოლიტიკური პარტიები ყოველწლიურად სულ უფროდაუფრო ითვისებენ სხვადასხვა სოციალურ მედიას, რასაც თავისი მიზნები გააჩნია.
უპირველეს ყოვლისა, უნდა აღვნიშნოთ სოციალური მედიის უპირატესობანი. საქართველოს მოსახლეობის დიდ ნაწილს გააჩნია სოციალური ქსელი (ერთი სახეობის მაინც), გარდა ამისა, ინფორმაციისა თუ სხვადასხვა განცხადების გავრცელება ინტერნეტის მეშვეობით ძალზე სწრაფი და მოსახერხებელია. სოციალური მედია საშუალებას იძლევა მცირე დანახარჯებით მარტივად და ეფექტურად მიაწოდო ინფორმაცია სამიზნე აუდიტორიას, რაც დღევანდელ ქართულ პოლიტიკურ პარტიებს ასე ძალიან სჭირდებათ. სწორედ ზემოთ დასახელებული და სხვა არაერთი მიზეზის გამო დღესდღეობით, ქართულ პოლიტიკაში სოცმედია მართლაც უდიდეს მნიშვნელობას ასრულებს.
ადგილობრივი თვითმმართველობის არჩევნებამდე 2 კვირაზე ნაკლებია დარჩენილი და ამ მხრივ სოციალურ მედიაში აქტიურობა ყოველდღიურად პიკს აღწევს. პოლიტიკურ პარტიებს სოციალურ ქსელ ფეისბუქში გააჩნიათ თავიანთი ოფიციალური გვერდები, მხარდამჭერთა და საინფორმაციო ჯგუფები, სადაც ღიად აცხადებენ თავიანთ ხედვებს, საარჩევნო პროგრამას, ერთი სიტყვით, აქტიურად ეწევიან წინასაარჩევნო კამპანიას. ცალკეულ პოლიტიკოსებსა და კანდიდატებს გააჩნიათ საკუთარი ფბ გვერდები, რომლის მეშვეობითაც ერთვებიან პირდაპირ ეთერებში, აკეთებენ განცხადებებს, მიმართავენ მოსახლეობას.. სოციალური მედიის ამ მხრივ გამოყენება სწორად შერჩეული ტაქტიკური ნაბიჯია, ვინაიდან მოსახლეობის დიდი ნაწილი დღეს აქტიურად სარგებლობს სოციალური მედიით.
მართალია, ზემოთ სოციალური მედიის მნიშვნელობასა და მის დადებით მხარეებზე ვისაუბრეთ, თუმცა უნდა ვთქვათ ისიც, რომ სხვადასხვა სოციალური მედია ხშირად ხდება სიძულვილის ენის გავრცელების მთავარი საშუალება. მაგალითისთვის, ფეისბუქში, განსაკუთრებით წინასაარჩევნოდ, აქტიურდება არაერთი ჯგუფი თუ გვერდი, რომლის უპირველესი ამოცანაა რომელიმე კონკრეტული პარტიისა თუ პოლიტიკური სუბიექტის დისკრედიტაცია, ეს ყველაფერი კი ძირითადად შავი პიარისა და პროპაგანდის საშუალებით ხდება. ამ მძიმე და საინტერესო საკითხზე მუშაობს არაერთი არასამთავრობო ორგანიზაცია, როგორიცაა „სამართლიანი არჩევნები“ , „საერთაშორისო გამჭირვალობა-საქართველო“ და სხვა. მაგალითისთვის, „სამართლიანი არჩევნების“ აგვისტოს თვის მედიამონიტორინგის ანგარიშის თანახმად, აგვისტოს თვეში გამოვლინდა 40-ზე მეტი ფეისბუქ ჯგუფი, რომლის მთავარ ამოცანას ოპოზიციის ლიდერების დისკრედიტაცია წარმოადგენდა. ასევე გამოვლინდა არაერთი დარღვევა, რომლის თანახმადად მუნიციპალიტეტის მერიების ოფიციალური გვერდებიდან ხდებოდა პოლიტიკური აგიტაცია და კონკრეტული კანდიდატის მხარდაჭერა, რაც კანონმდებლობით აკრძალულია. აქვე დავამატებ იმასაც, რომ ფეისბუქის ადმინისტრაცია აქტიურად ახორციელებს იმ გვერდებისა თუ ჯგუფების წაშლას, რომელიც სიძულვილის ენით გამოირჩევა.
მასალა მოამზადა: თორნიკე ყრუაშვილმა
