ვინი პუჰი 95 წლისაა. ყველა ბავშვისთვის საყვარელი დათუნია უკვე ცხრა ათეულზე მეტ წელს ითვლის. ალბათ, ბავშვობაში თითოეულ ჩვენგანს უოცნებია ისეთ სახლზე, როგორშიც ვინი ცხოვრობდა. ჯადოსნურია, რომ ეს ნატვრა უკვე არცთუ ისე ხელმიუწვდომელია.
სწორედ 95 წლის იუბილესთან დაკავშირებით, ბრიტანეთში, უფრო ზუსტად, აღმოსავლეთ სასექსში პატარა, ძალიან მყუდრო და ზღაპრული ქოხის კარი გაიღო. მსოფლიოს ამის შესახებ CNN-მა ამცნო.
ქოხი ოთხ ადამიანზეა გათვლილი. მხოლოდ ფოტოებიდანაც კი ჩანს, რამდენად შთამბეჭდავია ვინი პუჰის სამყოფელი. თაროები – რომლებზეც დათუნიას საყვარელი თაფლი მოგვაგონდება, ხის ავეჯი, ოთახის ფერები, ყოველი სარკმელი – წარმოგიდგენიათ, რამხელა გამართლება და ენითაღუწერელი სიხარულია აქ მოხვედრა?!
ჯადოსნური, მართლაც ჯადოსნური! ყველაზე შესაფერისი სიტყვა, რომლითაც ეს კარ-მიდამო უნდა დავახასიათოთ. დიახ, კარ-მიდამო, რადგან სტუმრების განკარგულებაში ქოხის გარშემო არსებული ტერიტორიაცაა. გამოსახულებიდან იგრძნობა, რა სიმშვიდე ელის აქ ადამიანს. ყველანაირ რეალობას მოწყვეტილი და ბავშვობაში დაბრუნებული, იქაურ ხალისსა და ბედნიერებაში ჩაძირული – ასე წარმომიდგენია დამსვენებელი, ვინც აქ მოხვდება.
ვინი პუჰის ჯადოსნური სახლი Airbnb-ზე ქირავდება. ერთი ღამე 129 დოლარი ღირს, ცოტაა, არა, ერთი ღამე? ალბათ, აქ რომ მოხვდები, უფრო მეტად მოგინდება დროის გაჩერება და უსასრულობის შეგრძნება. დათუნიას სამფლობელო დედამიწაზე უკვე არსებობს.
მასალა მოამზადა : მარიამ ტიელიძემ
