შეიძლება ითქვას, რომ მიმდინარე სეზონზე უკვე ნაკლებია ალბათობა, ჩვენ ქვეწარმავლები შეგვხვდენ. ეს გამოწვეულია ტემპერატურის კლებით და ზამთრის მოახლოებით, როდესაც ისინი დასაძინებლად ემზადებიან. თუმცა, საინტერესოა, როგორი იყო წლევანდელი ზაფხული ჩვენს დედაქალაქში გველების გავრცელების მხრივ.
როგორც ცხოველთა მონიტორინგის სააგენტოს ჰერპეტოლოგი, რატი მამუკაშვილი “თბილისი თაიმსთან” საუბრისას აღნიშნავს, ბოლო ხუთი წელია, ამ მხრივ მაჩვენებელი დიდად არ შეცვლილა.
“ბოლო 5 წელიწადის სტატისტიკური მონაცემები, შეიძლება ითქვას, ერთი და იგივეა. დიდად განსხვავება არ არის.
სულ საქართველოში 24 სახეობის გველია გავრცელებული. აქედან თბილისში არის 14. ამ 14 სახეობის ფარგლებში, წელს მოხდა, დაახლოებით, 300-მდე გველის დაჭერა, რომელიც შემდეგ გაშვებულ იქნა თბილისს გარეთ, ბუნებრივ არეალში, დაუსახლებელ ტერიტორიაზე. ამ 300 გველიდან 5 იყო გიურზა. თუმცა, ეს არ არის საგანგაშო რიცხვები, რადგან, ბოლო ხუთი წლის სტატისტიკური მონაცემების მიხედვით, მაჩვენებელი მსგავსია.
ქვეწარმავლების პრევენციის მიზნით, ზოგადად, ვახორციელებთ დაჭერა-გაყვანის მომსახურებას და ტერიტორიის დამუშავებას გველების დამაფრთხობლით, გამოძახების საფუძველზე”, – აღნიშნავს მამუკაშვილი.
როგორც ის განმარტავს, ამ წელს თბილისში არ ყოფილა გიურზას მიერ დაკბენის ფაქტი.
“ახლა, მიმდინარე სეზონე გველები კიდევ გვხვდებიან, თუმცა, არა ისეთივე ინტენსივობით. რადგან უკვე შემოდგომაა, ზამთარი ახლოვდება და ცივი ამინდები მოგვადგა კარს, იმდენად ხშირად აღარ გვხვდებიან, მაგრამ ამის ალბათობა მაინც არსებობს. ამინდების გაუარესებასთან ერთად, გველები უკვე წავლენ დასაძინებლად მიწაში. დაიძინებენ მარტის ბოლომდე, აპრილის დასაწყისამდე. შემდეგ უკვე გამოვლენ და გაარძელებენ აქტიურ ცხოვრებას”, – განმარტავს რატი და ის მოსახლეობას რჩევას აძლევს.
“ჩემი რჩევა მოსახლეობის მიმართ ასეთი იქნება – არ შეგეშინდეთ გველების, რადგან ისინი არცთუ ისე საშიშები არიან, როგორც ეს საზოგადოების დიდ ნაწილს ჰგონია“
მასალა მოამზადა : მარიამ ტიელიძემ