შეიძლება ითქვას, რომ გნომები ყველასთვის ჯადოსნურ სამყაროსთან ასოცირდება. განსაკუთრებით, ის შობა-ახალი წლის დღეებს მოგვაგონებს. შეუძლებელია, მის მიმართ ვინმე გულგრილი იყოს.
მაკო ქემერტელიძე საოცარ ნამუშევრებს ქმნის. მისი გნომები ძალიან სახასიათოა. თითოეული მათგანი ერთმანეთისგან განსხვავებულია, თუმცა, ხარისხი, განწყობა და ემოცია ყველას აერთიანებს.
“პირველი გნომი რომ გავაკეთე, ძალიან დიდი მოწონება დაიმსახურა, რასაც ვერ წარმოვიდგენდი. სწორედ ამან განაპირობა ის, რომ უკვე მეორე წელია, რაც ამ საქმეს ვაკეთებ. განსაკუთრებული შემთხვევა არაფერი მაკავშირებს. უბრალოდ საყვარელი არსებები არიან და, რაც მთავარია, ახალ წელს უხდებიან ძალიან”, – გვიყვება მაკო.
როგორც ის ამბობს, აქცენტს ნატურალურ და ბუნებრივ მასალებზე აკეთებს. აქვს მასალების მრავალფეროვანი არჩევანი გამომდინარე იქედან, რომ, გარდა გნომებისა, ამზადებს სხვა ნამუშევრებს, როგორიცაა სახლის აქსესუარები, ბალიშები და ა.შ.
“პირველ ყოვლისა, საქმეს ძალიან სერიოზულად ვუდგები. მასალებიც ბუნებრივი და ნატურალურია. ასევე, დიზაინი ძალიან განსხვავებულია და თვითონ გნომები რაღაცნაირად საყვარლები არიან.
უნდა აღვნიშნო, რომ მსურს, ყველამ შეძლოს ყიდვა, ამიტომ, ძვირი ფასები არ მიდევს. ყველა გნომი თუ ნივთი ჩემთვის განსაკუთრებული და განსხვავებულია, იმდენად გულით ვაკეთებ, სანამ მომხმარებლამდე მივა, ერთი სული მაქვს, როდის გავიგებ შთაბეჭდილებებს”, – აღნიშნავს მაკო.
როგორც ის “თბილისი თაიმსთან” საუბრისას ამბობს, გაფართოებასთან დაკავშირებით გეგმები აქვს – სურს ახალი ნივთების დამზადება, რათა მომხმარებელს ფართო არჩევანი ჰქონდეს.
მასალა მოამზადა : მარიამ ტიელიძემ
