როგორ არის შესაძლებელი, ოჯახებმა შეინარჩუნონ ფინანსური სტაბილურობა? რა არის ის საფუძველი, რასაც აღნიშნული მოცემულობა ემყარება? ეს არის საკითხი, რომელიც, ასე თუ ისე, ნებისმიერ ოჯახსა და ადამიანს ეხება.
როგორია, ამ მხრივ, მდგომარეობა ჩვენს ქვეყანაში და რა შემთვევაში არის შესაძლებელი, ოჯახმა იზრუნოს ფინანსური სტაბილურობის შენარჩუნებაზე – “თბილისი თაიმსს” “საზოგადოება და ბანკების” დამფუძნებელი, გიორგი კეპულაძე ესაუბრა.
“უპირველესად, მნიშვნელოვანია, რომ ოჯახებს შემოსავალი გაეზარდოთ. ამისთვის ადამიანები უნდა დასაქმდნენ და შემდეგ უკვე მოდის შემდეგი საკითხები – დაზოგვა, პირადი ბიუჯეტის შედგენა… მაგრამ ადამიანს, რომელსაც შემოსავალი თვიდან თვემდე შვილების გამოსაკვებად არ ჰყოფნის, დაზოგვაზე რომ ვესაუბროთ, ცოტა რთულია.
ამიტომ, რა თქმა უნდა, უმთავრესად მნიშვნელოვანია, რომ საქართველოს ეკონომიკა ვითარდებოდეს, იზრდებოდეს, იქმნებოდეს სამუშაო ადგილები ადგილობრივი მოსახლეობისთვის, მათ შორის, რეგიონებში, რათა იქ მაცხოვრებლებს არ უწევდეთ სამუშაოდ თბილისსა და სხვა დიდ ქალაქებში ჩასვლა. შემდეგ, ცხადია, უკვე შეგვეძლება, ვისაუბროთ, როგორ მიაღწიონ მათ ფინანსურ სტაბილურობას, როგორ დაზოგონ, როგორ დაგეგმონ სესხი. ეს ყველაფერი უკვე დამატებითი რჩევებია”, – განმარტავს კეპულაძე.
როგორც რესპონდენტი აღნიშნავს, საქართველოში ძალიან ბევრი ოჯახი სიღარიბის ზღვარს ქვემოთ იმყოფება.
“ჩვენ თუ ელემენტარულ სტატისტიკურ მონაცემებს გავეცნობით, ვნახავთ, რომ ძალიან ბევრი ადამიანი არის სიღარიბის ზღვარს ქვემოთ, ძალიან ბევრი ბავშვი ფიზიკურად ვერ იღებს იმდენ საკვებს, რაც მის ორგანიზმს სჭირდება. ეს გაჭირვება განსაკუთრებით ჩანს, სამწუხაროდ, რეგიონებში. არ იქნება სწორი, ვთქვათ, რომ საქართველოში ოჯახების დიდი ნაწილი არის ფინანსურად სტაბილური.
ეს წლებია, ასე გრძელდება. ჩვენ ძალიან მძიმე 90-იანი წლები გამოვიარეთ. ვიყავით ქვეყანა, რომელსაც არასწორი ეკონომიკური მოწყობა ჰქონდა. შემდეგ, შეიძლება ითქვას, გადავედით სამხედრო ანარქიაზე, სამოქალაქო ომი… ყევლაფერ ამის შედეგი არის ის, რომ დღეს საქართველოში ძალიან ბევრი ოჯახი ფინანსურად სტაბილური ვერ არის. იმისთის, რომ ეს გამოსწორდეს, საჭროა არა ხოლოდ მოკლევადიანი მოქმედებები, არამედ – გრძელვადიანი დაგეგმვა, თუ საით მივდივართ, რა ეკონომიკურ მოდელს ვანიჭებთ უპირატესობად, რა კონკურენტული უპირატესობა გვაქვს, რომელი დარგები უნდა განვავითაროთ. ოჯახების ფინანსური სტაბილურობა, უპირველესად, დამოკიდებულია სახელმწიფოს ფინანსურ სტაბილურობაზე.
ხალხმა უნდა იგრძნოს, რომ პოლიტიკოსებს მათი სატკივარი აწუხებთ და მართლაც უნდათ ქვეყანაში მდგომარეობის გამოსწორება. უპირველესად, ეს ეხება ეკონომიკურ მდგომარეობას, რადგან ყველა გამოკითხვაში უმუშევრობა, ხელფასების ზრდა და ეკონომიკური პრობლემები არის ყოველთვის უმთავრესი საკითხები”, – ამბობს გიორგი კეპულაძე “თბილისი თაიმსთან” საუბრისას.
მასალა მოამზადა: მარიამ ტიელიძემ
