რა მნიშვნელობისაა ჩვენი ქვეყნისთვის ხე-ტყის სწორი მართვა? ეს არის საკითხი, რომელიც ჩვენს ყოველდღიურობასთან პირდაპირ კავშირშია. არსებითია, რომ მოქალაქეებმა იცოდნენ, როგორ გამოიყენომ ეს რესურსი ისე, რომ მას ზიანი არ მიაყენოს.
საკითხის შესახებ “თბილისი თაიმსს” ეკოლოგი, კახა ბახტაძე ესაუბრა.
“შემუშავდა ახალი ტყის კოდექსი. ამის მიხედვით, მუნიციპალიტეტებს ექნებათ შესაძლებლობა, თვითონ მართონ მათ ტერიტორიაზე არსებული ტყეები. თუმცა, ამისთვის ჯერ უნდა შეფასდეს ტყეები. ასევე, შეიქმნა საქმიანი ეზოები, სადაც, ახალი მიდგომით, ხის მოსაჭრელად მაცხოვრებლები არ შევლენ ტყეში და ამას თვითონ არ გააკეთებენ. მოხდება რესურსების გამოტანა და მსურველები შეიძენენ მას, რის შემთხვევაშიც, ასე ვთქვათ, იქნება რამდენიმე მოცემულობა. ერთი, რომ თვითონ წაიღონ, მეორეა 30 კმ-ის რადიუსზე, რასაც აქვს სხვა ფასი, კიდევ უფრო შორს კიდევ სხვა ფასი. დაახლოებით, ასეთი ტიპის სისტემა იქმნება. ასევე, ახალი ინფრასტრუქტურა ყველა მუნიციპალიტეტში, რაც არის მნიშვნელოვანი გამოწვევა, რაც სატყეო სფეროს წინაშე დადგა”, – განმარტავს ეკოლოგი და ტყეების ტურისტული მიზნით გამოყენებას უსვამს ხაზს.
“ერთერთი მიმართულება, რაზეც მუშაობა მიმდინარეობს, არის სატყეო ტერიტორიების გამოყენება ტურისტული მიზნით. მიმდინარეობს სხვადასხვა პროექტის შემუშავება, რათა მოხდეს ტერიტორიების გამოყენება სხვადასხვა დანიშნულებით – ისე, რომ ამ რესურსზე არ მოახდინოს უარყოფითი გავლენა.
რაც ყველაზე მნიშვნელოვანია, ტყეების ინვენტარიზაცია ჩატარდა საკმაოდ ადრე. ეს მოხდა, დაახლოებით, 30 წლის. ამის შემდეგ, სახელმწიფომ ინვენტარიზაცია ჩაატარა გარკვეულ ტერიტორიებზე. ახლაც მიმდინარეობს ეს სამუშაოები. ასევე, მიმდინარეობს ეროვნული დონის ინვენტარიზაცია, სადაც მთელი საქართველო არის მოცული, თუმცა, ისე დეტალურად არა, როგორც – ადგილობრივი ინვენტარიზაციის შემთხვევაში. რეალურად, ახლა ხდება ინფორმაციის განახლება, ტყეების რა ფართობს ვფლობთ, რა მდგომარეობაშია ისინი და რა არის გასაკეთებელი იმისთვის, რომ აღდგეს და შენარჩუნდეს სატყეო ტერიტორიები, რომლებიც მნიშვნელოვანია და ძალიან ხშირად ატარებს დაცვით ფუნქციებს. დაცვის ფუნქცია არის ერთერთი მნიშვნელოვანი ფუნქცია, რაც ჩვენს ტყეებს აქვს, რადგან, ძირითადად, ჩვენი ტყეები მაღალი დახრილობის ფერდობებზეა განთავსებული, შესაბამისად, ატარებს ნიადაგის დაცვის ფუნქციას და ტყეების ჭრა როცა ხდება, ამას თან ახლავს ბუნებრივი კატასტროფების გამოწვევა”, – ამბობს ბახტაძე.
როგორც რესპონდენტი აღნიშნავს, მნიშვნელოვანია, რომ სატყეო ტერიტორიები სწორად და კარგად იყოს შეფასებული.
“არსებითია, რომ ამ ტერიტორიების მნიშვნელობა კარგად იყოს შეფასებული, განსაზღვრული, სწორად იყოს შემუშავებული ტყის მართვის გეგმები, რომლის საფუძველზეც მოხდება საქართველოს ტყეების მართვა. ძალიან მნიშვნელოვანია, რომ ჩვენს ქვეყანაში ტყეების 95 % არის ბუნებრივი მაშინ, როდესაც ევროპაში ტყეების დაახლოებით 5%-ია ბუნებრივი, დანარჩენი – ხელოვნურად გაშენებული. აქედან გამომდინარე, ძალიან დიდ ღირებულებასა და ინტერესს წარმოადგენს ჩვენი ტყეების შენარჩუნება. ასევე, აღსანიშნავია ის, რომ ბიომრავალფეროვნებისთვის სწორედ ტყეებია თავშესაფარი. შესაბამისად, ეს ფუნქცია არ უნდა დაგვავიწყდეს და უნდა იყოს გათვალისწინებული”, – ამბობს კახა ბახტაძე “თბილისი თაიმსთან” საუბრისას.
მასალა მოამზადა : მარიამ ტიელიძემ
