ისრაელის მთავრობამ 60 წელზე უფროსი ასაკის პირებისა და ჯანდაცვის მუშაკებისთვის კორონავირუსის საწინააღმდეგო ვაქცინის მეოთხე დოზა დაამტკიცა. ამის შესახებ ისრაელის პრემიერ-მინისტრმა, ნაფტალი ბენეტმა განაცხადა.
ნაფტალი ბენეტის თქმით, აღნიშნული ჯგუფის პირებმა ვაქცინის მეოთხე დოზა მესამე დოზის მიღებიდან, სულ მცირე, ოთხ თვეში უნდა მიიღონ.
„ჩვენ პირველები ვიყავით მსოფლიოში გამაძლიერებელი დოზის შეთავაზების კუთხით და ამ პოლიტიკამ კარგად დაიცვა ისრაელის მოქალაქეები“, – აღნიშნა ისრაელის პრემიერ-მინისტრმა.
ნაფტალი ბენეტმა ასევე განაცხადა, რომ ისრაელში კოვიდსიკვდილიანობის მაჩვენებელი მსოფლიოში ერთ-ერთი ყველაზე დაბალია. კერძოდ, 50-ჯერ უფრო დაბალია, ვიდრე დიდ ბრიტანეთში, 100-ჯერ უფრო დაბალია, ვიდრე გერმანიაში და 130-ჯერ უფრო დაბალია, ვიდრე შეერთებულ შტატებში.
ისრაელის პრემიერ-მინისტრი ქვეყნის მოქალაქეებს მოუწოდებს, ვაქცინაცია გაიარონ, პირბადეები ატარონ და რისკის ქვეშ მყოფი პირების დასაცავად ზომები მიიღონ.
