რუსეთის პრეზიდენტმა, ვლადიმერ პუტინმა ოკუპირებული დონეცკისა და ლუგანსკის ე.წ. „დამოუკიდებლობა“ აღიარა.
მანამდე რუსეთის მიერ ოკუპირებული დონეცკისა და ლუგანსკის ე.წ. „ლიდერებმა“ ვლადიმერ პუტინს აღიარება სთხოვეს.
15 თებერვალს, რუსეთის სახელმწიფო დუმამ დადგენილება მიიღო, რომელშიც რუსეთის პრეზიდენტს მოუწოდებს დონეცკისა და ლუგანსკის ე.წ. „დამოუკიდებლობა“ აღიაროს.
დონეცკისა და ლუგანსკის აღიარებამ შესაძლოა ძირი გამოუთხაროს მინსკის სამშვიდობო პროცესს აღმოსავლეთ უკრაინაში.
„კიევი არ იცავს მინსკის შეთანხმებებს. ჩვენს მოქალაქეებსა და თანამემამულეებს, რომლებიც დონბასში ცხოვრობენ, ჩვენი დახმარება და მხარდაჭერა სჭირდებათ“, – განაცხადა სახელმწიფო დუმის სპიკერმა, ვიაჩესლავ ვოლოდინმა.
უკრაინის საგარეო საქმეთა მინისტრმა, დმიტრო კულებამ აღნიშნა, რომ თუკი აღიარების შესახებ გადაწყვეტილება მიღებული იქნება, რუსეთი დე ფაქტო და დე იურე გავა მინსკის შეთანხმებებიდან ყველა თანმდევი შედეგით.
