უკრაინაში რუსეთის შეჭრის გამო, ამ უკანასკნელის წინაშე მსოფლიო ლიდერებმა და ორგანიზაციებმა სანქციები აამოქმედეს. როგორ აისახება არსებული რეალობა საქართველოზე და რა მიმართულებებით მიადგება მას ზიანი – ამის შესახებ “თბილისი თაიმსს” ანალიტიკოსი, ზაალ ანჯაფარიძე ესაუბრა.
“დავიწყოთ SWIFT-თან დაკავშირებული საკითხით – ეს აისახება ექსპორტიორებზე და მათთვის გართულდება ანგარიშსწორება, გაყიდული პროდუქციიდან თანხების მიღება. ეს არის ცალსახა. როგორც რუსეთისთვის იქნება გართულებული გაყიდული გაზისა და ნავთობისგან თანხების მიღება SWIFT-დან გათიშვის პირობებში, ისე – სხვა ექსპორტიორებისთვის, რომლებსაც რუსეთში პროდუქცია შეაქვთ.
გარდა ამისა, როგორც ვიცით, ჩვენი ეკონომიკა ძალიან სერიოზულად არის მიბმული რუსულ ეკონომიკაზე. რუსული რუბლის ასეთმა სერიოზულმა დაცემამ უკვე იქონია გავლენა ლარის კურსზე. კურსი სულ რაღაც ორი კვირის წინ 2.95-ზე იყო, დღეს კი 3.20-ზეა. თუ სიტუაცია არ დასტაბილურდა – და, სავარაუდოდ, დიდხანს არც დასტაბილურდება, ჩვენი ქვეყნის ეკონომიკური პარამეტრები გამოწვევის წინაშე აღმოჩნდება.
ასევე, რუსეთი არის ხორბლის უმსხვილესი ექსპორტიორი საქართველოში. ჩვენი ხორბლის მარაგის ძირითადი ნაწილი რუსეთიდან შემოდის და თუ იქ, მათ შორის, სასურსათო პრობლემები შეიქმნა, გასაგებია, რომ ეს უარყოფითად აისახება ჩვენს ეკონომიკაზე. საერთოდ, სავაჭრო-ეკონომიკურ კავშირებზე ეს ყველაფერი გავლენას იქონიებს. ხელის გულზე დევს და ცალსახად ნათელია, ჩვენს ეკონომიკას, გარკვეულწილად, ზიანი მიადგება”, – ამბობს ზაალ ანჯაფარიძე.
