რაც შეეხება დისკრიმინაციას, ვისაც არ უნდა ეხებოდეს, ეროვნებით რუსს შეეხება, თუ ნებისმიერი სხვა ქვეყნის მოქალაქეს, იქვე დავუშვებთ შეცდომას, იმიტომ რომ დისკრიმინაცია ნებისმიერი ნიშნით, არის უდიდესი სიბნელე, – ამის შესახებ პარტია „ქართული ოცნების“ აღმასრულებელმა მდივანმა, მამუკა მდინარაძემ განაცხადა.
„ჩემს ბავშვობაში მაგალითად, როცა მტრის მიმართულებით უნდოდათ რაღაცის, ცუდის თქმა, ჯერ კიდევ შემორჩენილი იყო ტრენდი, რომ გერმანელებს ეძახდნენ მეორე მსოფლიო ომიდან და ფაშიზმიდან გამომდინარე. ეს იყო სიბნელე მაშინაც და ახლაც მიმაჩნია, რომ უკიდურესი სიბნელეა, რომ ეროვნული ნიშნით გაარჩიო ადამიანი, რადგან კონკრეტულ შემთხვევაში რაღაც დიდი ბოროტება ხდება.
როდესაც შენ აიძულებ ადამიანს, რომ არ ისარგებლოს თუ უნდა მას შენი მომსახურებით იმიტომ რომ ის არის, რომელიმე ერის წარმომადგენელი, რომლის სახელმწიფოც დღეს ცუდ საქმეს აკეთებს, როგორც კი ეროვნული ნიშნით გაარჩევ, იმ წუთას შენ ხდები დისკრიმინაციის ავტორი, რომელიც არის შუა საუკუნეების მიდგომა. და დღეს ცდილობენ ადამიანები, რომ ეს გაამართლონ რაღაც ემოციებით, რომელიც ყველა ქართველს აქვს, მაგრამ ამ ემოციებით რაღაცის გამართლება და დისკრიმინაცია, ეროვნული ეთნიკური ნიშნით, შოვინიზმია, თუ რა მავნებლობაა და სიბნელეა, მე ალბათ სიტყვებიც არ მეყოფა ამის გამოსახატად“, – განაცხადა მდინარაძემ.
