„თამბაქოს ინდუსტრია უკანონოდ აფინანსებს პრომოსააგენტოებს, რომ მათი  ბრენდების პოპულარიზაცია მოახდინონ სავაჭრო ობიექტებში“ – ბახტურიძე

„პრომოაქციები აკრძალულია 2018 წლის პირველი მაისიდან. თუმცა, თამბაქოს ინდუსტრია ინტენსიურად, უკანონოდ აფინანსებს პრომოსააგენტოებს იმისთვის, რომ მათი კონკრეტული ბრენდების პოპულარიზაცია მოახდინონ სავაჭრო ობიექტებში. რაც შეეხება გამოვლენას  – აქ პრობლემები გვქონდა იმ მხრივ, რომ ჯარიმდებოდა მხოლოდ პრომოსააგენტო და მაღაზია არ იღებდა არანაირ პასუხისმგებლობას. შესაბამისად, მაღაზია მაინც უთმობდა ფართს პრომოსააგენტოების წარმომადგენლებს, რათა გაეწიათ სხვადასხვა ბრენდის პროპაგანდა“, – ამის შესახებ “თბილისი თაიმსს” თამბაქოს კონტროლის ალიანსის თავმჯდომარემ,  გიორგი ბახტურიძემ განუცხადა.

როგორც ბახტურიძემ აღნიშნა, უკვე პირველი იანვრიდან ჯარიმდება როგორც პრომოსააგენტო, ასევე – სავაჭრო ობიექტი.
„შემდგომ, ჩვენი საკანონმდებლო ინიციატივისა და დაავადებათა კონტროლის ეროვნული ცენტრის ფარგლებში, უკვე პირველი იანვრიდან ჯარიმდება როგორც პრომოსააგენტო, ასევე – სავაჭრო ობიექტი.  რაც შეეხება ადმინისტრირებას – მისი ადმინისტრატორი გახლავთ შემოსავლების სამსახური და ის ახდენს რეაგირებას პროცესებზე. თუმცა, ძირითადად, გამოვლენა ჩვენი მონიტორების ხარჯზე ხდება. ქვეყნის მასშტაბით, ჩვენ გვყავს 40-მდე მონიტორი და, დაახლოებით, 8 000 სავაჭრო ობიექტს ვამოწმებთ ყოველწლიურად.  სავაჭრო ობიექტებში სხვადასხვა ტიპის დარღვევების ასეულობით შემთხვევას ვაწყდებით. მათ შორის, პრომოგოგონებთან მიმართებით.
როგორც კი დარღევას ვაფიქსირებთ – უმეტესად, ეს ხდება საღამოს საათებში, რადგან შემოსავლების სამსახური არ არის ოპერატიული სამსახური – გვიწევს პატრულის გამოძახება. საპატრული სამსახური ახდენს ფაქტის დაფიქსირებას, შემდგომ – ამ დოკუმენტებს უგზავნის შემოსავლების სამსახურს რეაგირებისთვის, ეს უკანასკნელი კი გამოწერს საჯარიმო სანქციას პრომოსააგენტოზე, ასევე, სავაჭრო ობიექტზეც. ამ ნორმამ უკვე საკმაოდ კარგად იმუშავა და პრომოაქციები ისეთივე ინტენსივობით აღარ გვხვდება“, – განაცხადა გიორგი ბახტურიძემ.