პირველი ივლისიდან თბილისსა და რეგიონებში ბიზნესისთვის გაზის ტარიფი იზრდება, რაც იმას ნიშნავს, რომ „თბილისი ენერჯი“ დედაქალაქში არასაყოფაცხოვრებო მომხმხარებლებისთვის ტარიფს 25 თეთრით ზრდის, „სოკარ ჯორჯია გაზი“ კი რეგიონებში ბუნებრივ აირს 23 თეთრით აძვირებს. თბილისში ბიზნესსუბიექტებისთვის კუბური მეტრი გაზის ღირებულება 1,35 ლარი იქნება, რეგიონებში კი – 1,38 ლარი.
„თბილისი თაიმსთან“ საუბრისას საკითხს ეკონომიკის ექსპერტი, იოსებ არჩვაძე აფასებს.
„ჩვენ ვართ ბუნებრივი აირის იმპორტიორი ქვეყანა. გარკვეულწილად, ფასების ზრდაზე გავლენას ეს ფაქტორიც ახდენს – არა თუ იმპორტირებული ფასის საფასურის გადახდა, არამედ – იმპორტირებული ფასის მომხმარებლამდე მიტანის საექსპლუატაციო ხარჯი განაპირობებს ტარიფის ზრდას. ჩვენ მრავალწლიანი, ურთიერთსასარგებლო ხელშეკრულებები გვაქვს დადებული აზერბაიჯანთან, საიდანაც საკმაო რაოდენობის ბუნებრივ აირს ვიღებთ და ეს კავშირები კიდევ უფრო გაფართოვდება ევროპისა და თურქეთის მიმართულებით, აზერბაიჯანული ბუნებრივი აირის მიწოდების პარალელურად. მაგრამ ნებისმიერი საქონელის წარმოებისა და მიწოდების კომპონენტები ბევრ ფაქტორზეა დამოკიდებული – ეს გახლავთ საექსპლუატაციო ხარჯები, სათადარიგო ნაწილები და სხვა, მათ ზრდის ტენდენცია ახასიათებთ და, ადრე თუ გვიან, ეს აუცილებლად მოახდენდა გავლენას სამომხმარებლო ტარიფზე.
ვფიქრობ, ამას გაგებით უნდა შევხვდეთ. თუ სხვა ქვეყნების ტარიფებს შევხედავთ, ფაქტობრივად, მათთან შედარებით, ამ მხრივ, უკეთესი მდგომარეობა გვაქვს – ერთერთი დაბალი გვაქვს მსოფლიოში. მით უმეტეს, საქართველო, როგორც უკვე აღვნიშნე, არ არის მწარმოებელი ქვეყანა და, შიდა წარმოების მასშტაბები რომ ავიღოთ, ხატოვნად რომ ვთქვათ, ახალი წლის 12 საათზე რომ ჩავრთოთ გაზქურა, დილით 5 საათამდე არ გვეყოფა საკუთარი ბუნებრივი აირი“, – განაცხადა იოსებ არჩვაძემ.
