„სამწუხაროდ, პირადად ჩემთვის მოლოდინი ცოტა პესიმისტურია, ევროპარლამენტის რეზოლუციის შემდეგ. ევროპარლამენტმა ცალსახად დაუჭირა მხარი წინა რეზოლუციებში მოლდოვასა და უკრაინის ევროკავშირის წევრობის კანდიდატის სტატუსის მინიჭებას, ხოლო საქართველოსთან მიმართებით ასეთი ცალსახა მხარდაჭერა არ დაფიქსირებულა. თუკი ისე მოხდა, რომ საქართველომ მიიღო იმაზე უფრო ნაკლები, ვიდრე – უკრაინამ და მოლდოვამ (ან საერთოდ უარი უთხრეს, რაც არ მგონია), ფაქტობრივად, ეს იმას ნიშნავს, რომ ევროკავშირი აგდებს საქართველოს ასოცირების ტრიოს ფორმატიდან“, – ამის შესახებ ანალიტიკოსმა, ზაალ ანჯაფარიძემ „თბილისი თაიმსთან“ საუბრისას აღნიშნა.
როგორც ანალიტიკოსმა განმარტა, არ არის გამორიცხული, უკრაინასა და მოლდოვასთან შედარებით, ევროკავშირმა საქართველო დაბალ რანგში გაიყვანოს.
„მე ვფიქრობ, ის გადაწყვეტილება, რაც შესაძლოა, ახლა მწიფდება ევროკავშირის კულუარებში საქართველოსთან მიმართებით, იყოს განსხვავებული სტატუსი უკრაინისა და მოლდოვისგან – შესაძლოა, მათთან შედარებით დაბალ რანგში გაგვიყვანონ მიუხედავად იმისა, რომ ჩვენ ვუსწრებთ ასოცირების დღის წესრიგის შესრულებით თითქმის ყველა პარამეტრში.
თუ ეს მოხდა, ჩემი აზრით, იქნება წმინდა პოლიტიკური გადაწყვეტილება უკრაინის ომის გამო შექმნილი გეოპოლიტიკური კონტექსტიდან გამომდინარე. რას ნიშნავს ეს – შესაძლოა, ბევრმა გამაკრიტიკოს ამის გამო, მაგრამ მე მაინც მგონია, რომ ეს უკავშირდება საქართველოს მიერ რუსეთის წინააღმდეგ ე.წ. მეორე ფრონტის გახსნას, რომელსაც ჩვენი ხელისუფლება არ თანხმდება, მიუხედავად სხვადასხვა ტიპის ღია თუ ფარული ზეწოლისა, რომელიც მოდის კოლექტიური დასავლეთისგან. აქედან გამომდინარე, აღნიშნული რეზოლუცია, მის წინ ორი ევროპარლამენტარის წერილი, ოპოზიციისთვის ხელში ინსტრუმენტის ჩადებაა, რომ მათ ქვეყანაში დაიწყონ მოძრაობები, გამოსვლები ხელისუფლების შეცვლისთვის. ეს გახლავთ პირდაპირი ხელშეწყობა იმისთვის, რომ ქვეყანაში მოხდეს “ხავერდოვანი რევოლუცია”, – განაცხადა ზაალ ანჯაარიძემ.
