არცთუ ისე დიდი ხანია, რაც მომხმარებლებს აქვთ შესაძლებლობა, ისარგებლონ სერვისით, რომელსაც მათ „ბოსტანი“ სთავაზობს. იდეას აქვს საკუთარი ისტორია, რომელიც მცირეწლოვნების ჯანსაღ კვებას უკავშირდება. გადადგმულმა ნაბიჯმა გაამართლა და დღეს უკვე სრულიად ნატურალური, ორგანულად მოყვანილი პროდუქტი ნებისმიერი მსურველისთვის არის ხელმისაწვდომი. „თბილისი თაიმსს“ ბექა ბარჯაძე ესაუბრა.
რამდენი ხანია, რაც არსებობს „ბოსტანი“?
ჩვენი ბიო სასათბურე მეურნეობის მშენებლობა 2020 წელს, პანდემიის დროს დავიწყე. წელიწადზე მეტი მოვუნდი სრულად დასრულებას.
დეტალურად, რას გულისხმობს თქვენი საქმიანობა?
ჩვენი საქმიანობა გულისხმობს ნატურალური პროდუქტის (ბოსტნეულის) მოყვანას, რისი დეფიციტიც არის ჩვენს ქვეყანაში. ამჟამად, გავდივართ ბიო სერტიფიცირებას. ბიოში გარდამავალი სერტიფიკატი უკვე მოგვანიჭა „კავკასსერტმა“
რის გამო გაგიჩნდათ იდეა, ამ მიმართულებით დაკავებულიყავით?
პირველ ყოვლისა, ჩემი შვილების გამო, რადგან პატარებისთვის, და არამხოლოდ მათთვის, ჩვენთვისაც – ზრდასრული ადამიანებისთვის ძალიან მნიშვნელოვანია და აუცილებელი ნატურალური ბოსტნეულის მიღება ჯანმრთელობისთვის. დღეის მდგომარეობით, ძალიან დეფიციტურია მსგავსი პროდუქციის მოძიება და არც არის ბაზარზე ხელმისაწვდომი. სწორედ ამ სიტუაციამ გამიჩინა იდეა-სურვილი, შემექმნა ისეთი მეურნეობა რომლითაც შევძლებდი არასეზონური ბოსტნეული კულტურების მოყვანას, რომელიც იქნებოდა სრულიად ნატურალური, ორგანულად მოყვანილი პროდუქტი.
სიახლეებს რამდენად ხშირად სთავაზობთ საზოგადოებას?
სიახლეების ძიებაში ყოველთვის ვართ, ყოველთვის ვეძებთ ევროპის სხვადასხვა ქვეყანაში გამორჩეული გემოს მქონე ბოსტნეულ კულტურებს, ჩამოგვაქვს საცდელად, ვაკვირდებით – რამდენად ეგუებიან ჩვენს პირობებს და თუ როგორი გემოვნური თვისებები აქვთ. დაკვირვების შედეგად, დღეის მდგომარეობით, უკვე ჩამოყალიბებული ვართ, თუ რომელი კულტურის და სახეობის წარმოებას მოვლა-მოყვანას განვაგრძობთ სამომავლოდ. აქვე დავამატებთ იმას, რომ ჩვენი 7 სახეობა პომიდორი, 2 სახეობა ტკბილი წიწაკა, ბროკოლი, 3 სახეობა ყაბაყი იგივე ცუკინი, კიტი, ბოლოკი საკმაოდ პოპულარობით სარგებლობს ჩვენს მომხმარებლებში. აუცილებლად განვაგრძობთ სხვა ახალ ჯიშებზე დაკვირვებას, რომლებიც საქართველოში მხოლოდ „ბოსტნის“ მეურნეობის ბრენდით იქნება ნაწარმოები.
ამ ყველაფერთან ერთად, 2023-დან ბევრ ახალ სასიხარულო ამბავს ვუმზადებთ ჩვენს მომხმარებელს.
