ერთი შეხედვით, დღეს ჩვენ გარშემო საკმაოდ ბევრი ხელოვანი ამზადებს ხელნაკეთ ნივთებს, როგორებიცაა სამკაულები, ბრელოკები, ჭიქები… საკუთარი გემოვნებითა და ისტორიებით, მათ მომხმარებლები სურვილებს დეტალურად უზიარებენ და ელიან საუკეთესო ნამუშევრებს. ნიკა გაგლოშვილი სწორედაც რომ ზემოთ ჩამოთვლილ ნივთებს ამზადებს. თუმცა, საკუთარი ხელწერის წყალობით, რთულია, მრავალთაგან მისი ნამუშევრები ვერ განასხვავო. განი • GANI handmade – ასე ჰქვია მის საქმიანობას. „თბილისი თაიმსს“ ნიკა თავად ესაუბრა.
„ხელნაკეთ ნივთებს, ძირითადად, პოლიმერული თიხით ვამზადებ. ზოგიერთ ნივთში არის ხოლმე შერეული სხვა მასალებიც. მაგალითად, ხე, რკინა და ა.შ. იდეები ჩემით მომდის. ინსპირაციის წყარო არის ხოლმე სხვადასხვა.
ჩემთვის მთავარია, ორიგინალური და განსაკუთრებული ნივთი დავამზადო. მხოლოდ მზა ნივთები არ მაქვს. ასევე, ვიღებ ინდივიდუალურ შეკვეთებსაც. ამიტომ, ზოგჯერ მომხმარებლებიც მაწვდიან იდეებს, როდესაც რაიმე ისეთ ნივთს მიკვეთენ, რომელიც მანამდე არ მქონდა დამზადებული.
მაქსიმალურად ვცდილობ, მათი ფანტაზიები განვახორციელო და სასურველი სუვენირები დავუმზადო.
დღეს მსგავს ნივთებს ბევრი ამზადებს, მაგრამ ყველას თავისი ხელწერა და სტილი აქვს. ის, რაც სხვებისგან განმასხვავებს, არის ორიგინალურობა, ისეთი ნივთების შექმნა, რომელიც არავის გაუკეთებია. ვქმნი ჩემი დიზაინითა და ტექნიკით“, – ამბობს ნიკა და ხაზს უსვამს, თუ რა არის მისთვის მნიშვნელოვანი, როდესაც ნივთებს ქმნის.
„ნამუშევრების შექმნის პროცესში ჩემთვის ყველაზე მნიშვნელოვანია, ვიყო კარგ ხასიათზე. როდესაც კარგი განწყობა გაქვს, შესაბამისად, ნივთებიც კარგი გამოდის. ასევე, მნიშვნელოვანია დეტალები, რომლებსაც დიდ დროს ვუთმობ და ბევრს ვმუშაობ. ცნობილი გერმანელი არქიტექტორი, მის ვან დერ როე ამბობს: ,,ღმერთი დეტალებშია”. სწორედ ასეა, როდესაც დეტალებს დიდ ყურადღებას აქცევ და განსაკუთრებულად ამუშავებ, ნამუშევარიც მთლიანობაში შესანიშნავი გამოდის.
დეტალებმა შეიძლება, დაგანახოს ოსტატის ხედვა და ნიჭი, მისი შინაგანი სამყაროც კი.
სიახლეებს, ფაქტობრივად, ყოველთვის ვთავაზობ მომხმარებლებს. ვცდილობ, ახალი და განსხვავებული ნივთები დავამზადო – ისეთები, რომლებიც ჯერ არ გამიკეთებია. ამჟამად, ვამზადებ ჭიქებს, ბრელოკებს, სამკაულებს, სუვენირებს. მომავალში კიდევ უფრო მრავალფეროვანი გახდება“, – ამბობს ნიკა გაგლოშვილი.
