ყველასთვის კარგად ცნობილია, რომ ქალბატონებისთვის გამორჩეული ატრიბუტია ჩანთა. მათი უამრავი, უთვალავი ვერსია არსებობს. რაც უფრო ხარისხიანი და განსაკუთრებული ვიზუალისაა ჩანთა, მოთხოვნაც სწორედ მასზეა დიდი.
ლელა დავლიანიძე ამ აქსესუარს ქვილთის ტექნიკით ქმნის. ეს არის პროცესი, რომელიც პატარ-პატარა ნაჭრების ერთმანეთზე გადაკერებით დიდი ქსოვილის შექმნას ითვალისწინებს. ეს ნიშნავს იმას, რომ შეუძლებელია, ამ ტექნიკით დამზადებული ჩანთა თვალში არ მოგხვდეთ. ბრენდის სახელწოდებაა Ploomp–პლუმპი.
“თბილისი თაიმსს” ლელა დავლიანიძე ესაუბრა.
“ამ ეტაპზე, მხოლოდ ჩანთებზე ვარ ორიენტირებული. სამომავლოდ, სხვა პროდუქციაზე მუშაობასაც ვგეგმავთ, თუმცა, ამჯერად, მხოლოდ ჩანთებით შემოვიფარგლები. ისინი იმით არის გამორჩეული, რომ გახლავთ ხელნაკეთი და მზადდება პატარ-პატარა ნაკუწებისგან. იხსნება ქსოვილის ერთი დიდი სახე, მაგრამ არის ერთმანეთზე გადაბმული პატარა ქსოვილები. იქნება ეს ორნამენტი თუ ფიგურა, ყველაფერი მცირე დეტალებისგან იქმნება. სწორედ ეს არის ის, რაც მათ გამოარჩევთ”, – ამბობს ლელა და ხაზს უსვამს, რომ ამ ტექნიკით ჩანთის შექმნა დიდ შრომასა და დროსთან არის დაკავშირებული.
პროცესი საკმაოდ შრომატევადია და დიდი დრო სჭირდება. სხვათა შორის, არ მეგონა, თუ საზოგადოებისგან ასეთი დიდი დაინტერესება მოჰყვებოდა. ხელნაკეთი ნივთების მიმართ უკვე იგრძნობა დაფასება. ისინი იაზრებენ, რამხელა შრომა დევს ამ ყველაფერში.