რამდენიმე კვირის წინ საზოგადოებამ შეიტყო ციხისჯვრის მამა გაბრიელის სახელობის დედათ მონასტერზე, სადაც სწორედ მამა გაბრიელის ნაქონი სარტყელი ინახება და რწმენითა და გულწრფელი თხოვნით მოსულებს არაერთ სურვილსაც უსრულებს.
სწორედ აქ მოღვაწეობს მონასტრის ერთადერთი მონაზონი, 75 წლის დედა ნატალია, რომლის მითითებებსაც ასრულებენ იქ მისულნი. დედა ნატალია „პრაიმტაიმთან“ ინტერვიუში იხსენებს ფაქტებს, როცა ერთი შეხედვით უბრალო, მაგრამ უდიდესი ძალის მქონე, მამა გაბრიელის სარტყელით განკურნებულან ბრმანი, უშვილონი, მუნჯები. დედა ნატალიას თქმით, განკურნებული კვლავ უკან ბრუნდებიან სამადლობლად: „დედაო, დედაჩემი მოვიყვანე, შენი ლოცვით თვალებში ჩინი დაუბრუნდა….“ თუმცა იგი ამბობს: „ჩემი ლოცვით კი არა, მამა გაბრიელის სასწაულით.“
დედა ნატალია ინტერვიუში ჰყვება, რომ საერო ცხოვრებაში იგი ინგლისურის მასწავლებელი გახლდათ და მას „თიჩა მანანას“ ეძახდნენ. როცა დედა და ქმარი გარდაეცვალა, სადგერის მონასტერში მეუფე სერაფიმემ მორჩილი პირდაპირ მონაზვნად აკურთხა. საინტერესოა ის ფაქტიც, რომ მეუფე სერაფიმე ჯოჯუას მოღვაწეობაში ეს იყო პირველი შემთხვევა, როცა პირდაპირ მოხდა მონაზვნად აღკვეცა, მისი ეტაპის გავლის გარეშე, სწორედ ეს იყო პირველი და უკანასკნელი შემთხვევა მის სასულიერო ცხოვრებაში.
დედა ნატალია სწორედ ხარების დღესასწაულზე აკურთხეს, მას შემდეგ იგი დაუღალავად ლოცულობს, უვლის მონასტრის ტერიტორიას, მანუგეშებელი სიტყვებით ხვდება იქ მისულ სნეულებს და რაც მთავარია, თითოეეულ მათგანს უყვება აწ უკვე მომხდარი სასწაულების შესახებ და განკურნებაში ეხმარება.
სწორედ სოფ. ციხისჯვრის ეს პატარა მონასტერი არის წმინდანის, მამა გაბრიელის სახელზე აგებული პირველი ტაძარი. მისი წინამძღოლი, დედა ნატალიას შვილი, არქიმანდრიტი გაბრიელ ჯამბაზიშვილი გახლავთ. იგი „პრაიმტაიმთან“ ინტერვიუში ამბობს, რომ მონასტერი მთელ მხარეში გამოირჩევა უშვილოთა შემწედ, ამიტომაც ყველას მოუწოდებს, რომ აუცილებლად ესტუმრონ აღნიშნულ მონასტერს.
წყარო: პრაიმტაიმი
