ადამიანი, რომლის შესახებაც ახლა გიამბობთ, თარიღებით, ინტერესით, საკუთარი ისტორიით ბახმაროსთან არის დაკავშირებული. ქეთევან გობრონიძე დღეს ხუთი შვილის დედაა. პარალელურად, აქვს საქმიანობა, რომლის მიმართ მოთხოვნილებამ და მასშტაბებმა საწარმოს გახსნის აუცილებლობა შექმნა. დეტალებზე ქეთევანი „თბილისი თაიმსს“ ესაუბრა.
„7 წელია, რაც გირჩის პროდუქციის წარმოება დავიწყე. მაშინ 3 ბავშვით დავდიოდი ტყეში, ახლა 5 მყავს უკვე. ბავშვები დიდები არიან და მეხმარებიან შეგროვების, დამზადების პროცესში, მეუღლეც და და-ძმაც. უსაზღვრო ენერგიას მოითხოვს 5 შვილის მოვლა, აღზრდა და დამატებით მთაში მასალის მოკრეფა, მარტო ბავშვებთან ერთად ჩამოტანა, დამზადება, ჭურჭლის გამზადება, ჩასხმა, ზარებზე პასუხი, ახსნა, მისამართების ჩანიშვნა, ტრანსპორტის ნახვა, საკურიეროში გაფორმება. 80% ჩემს შრომაზე მოდის. ღმერთმა ბევრჯერ მაჩუქა სიცოცხლე და საჭირო ენერგიასაც მაძლევს. მოკლედ, ეს ფასი, რაც პროდუქტს აქვს – ნაჩუქარია. ეს შრომა მალე გადანაწილდება, როცა საწარმო გაიმართება. რაც მთავარია, შვილები სწავლობენ შრომას, გულშემჭირნეობას, ადამიანების სიყვარულს – გაუმართონ ხელი პრობლემების დროს. მე კმაყოფილი ვარ ჩემი ცხოვრებით.
ვამზადებ ბახმაროს გირჩის კავკასიური სოჭის ზრდასრული გირჩის ნახარშს. კავკასიური სოჭის თვისებები ბოლომდე შესწავლილი არ არის, რაც საქართველოში მხოლოდ ალპურ ზონაში – 2000 მ ზემოთ გხვდება და თავისი აღნაგობითა და სამკურნალო თვისებებით მკვეთრად განსხვავდება სხვა გირჩებისაგან. 7 წლის პრაქტიკამ და დაკვირვებამ გამოავლინა ბახმაროს გირჩის სასწაული, სასიცოცხლოდ საჭირო სამკურნალო თვისებები, რადგან ბახმაროს აქვს ისეთი ადგილმდებარეობა და კლიმატური სარტყელი – სადაც ზღვისა და მთის ჰაერი ერწყმის ერთმანეთს, რაც ჰაერს და მცენარეებს სასწაულ სამკურნალო თვისებებს სძენს.
მოკლედ, მსოფლიოში არ მოიძებნება მსგავსი ადგილი მსგავსი ჰავათა შერწყმით. მართალია, ტყეს უჭირს, აქვს დაავადებები – გარკვეული დაავადება სოჭის ნაყოფში ვითარდება, აქედან გამომდინარე, გარკვეული მკურნალობაა ნაყოფის მოშორება თავის დროზე, რასაც ჩვენი წარმოების პროცესი უზრუნველყოფს, გარკვეულწილად. ახლო მომავალში ვეცდებით, ფართო მაშტაბით ვუმკურნალოთ ტყესაც და ადამიანებსაც“, – ამბობს რესპონდენტი და გვიამბობს, როგორ გადადგა ამ მიმართულებით პირველი ნაბიჯები.
„პირველად საკუთარ ბავშვებს დავუმზადე ბახმაროს გირჩის სიროფები. შედეგი იყო ის, რომ გაუწმინდა ორგანიზმი, გაუძლიერა იმუნიტეტი, რამაც თითქმის შეზღუდა ვირუსებისა და დაავადებების უარყოფითი ზეგავლენა ორგანიზმზე.
პირველად 40 დღე ბახმაროში შემისრულდა, მას შემდეგ დავდივარ და ვაგროვებთ ბახმაროს სიკეთეებს; სოკოებს, მთის მარწყვს, ჟოლოს, მოცვს, გვირილას… ბახმაროს შავი ტიტა ხომ მსოფლიოს უიშვიათესი და ულამაზესი რამ არის.
უშაქრო ნახარშებმა დიდი მოწონება დაიმსახურა და უკვე მთელი საქართველოს მასშტაბით ვაგზავნით. მიაქვთ ემიგრანტებსაც, რადგან მათ ექიმთან მისვლის ვითარება არ გააჩნიათ უცხო მიწაზე.
დიდი მოთხოვნილებიდან გამომდინარე, გაჩნდა საწარმოს გახსნის აუცილებლობა. მონაწილეობა მივიღე საგრანტო კონკურსსა და 60 პროექტში, ერთერთი გამარჯვებული გავხვდი გურიის რეგიონში, რაც მომცემს მცირე საწარმოს გამართვის შესაძლებლობას“, – ამბობს ქეთევან გობრონიძე „თბილისი თაიმსთან“ საუბრისას.
