საკუთარი ამბების, შეგრძნებების, ემოციების გადმოცემის ხერხები ყველა ადამიანისთვის განსხვავებულია. ჩვენ გამოვხატავთ სურვილებს იმის მიხედვით, თუ რისი უნარი გვაქვს. ნებისმიერ შემთხვევაში, დეტალები მნიშნელოვანია და ყოველი ადამიანის შემთხვევაში მათ განსაკუთრებული დატვირთვა აქვს.
ზურაბ ეფრემიძისთვის თვითგამოხატვის საუკეთესო საშუალება საკუთარი ისტორიების ფურცელზე გადატანაა. ის თვითნასწავლი მხატვარია. გამოწვევები მისთვის მნიშვვნელოვანია და მუდმივად ცდილობს, ნახატებში გადმოიტანოს საკუთარი შინაგანი სამყარო. დეტალურად, “თბილისი თაიმსს” ზურა თავად უყვება.
თვადაპირველად, მოგვიყევით – რას ნიშნავს თქვენთვის მხატვრობა?
ხატვა არ მისწავლია და არც მგონია, რომ ეს სამწუხარო ამბავია. ყოველთვის მერჩივნა – ჩემით მესწავლა, ახალ გამოწვევებს შევჭიდებოდი. ვცდილობ, ჩემი ნახატების საშუალებით გამოვიტანო ჩემში დაგროვებული შეგრძნებები, ფიქრები და ჩემი შინაგანი სამყარო, ის სამყარო – რომლის ჩვეულებრივი თვალით დანახვა შეუძლებელია.
ძირითადად, ვმუშაობ ტილოებზე, ზეთის საღებავებით. ზეთი მაძლევს საშუალებას, მეტი სიამოვნება მივიღო ხატვის პროცესით. მთავარია, კონკრეტული ნახატი რა სახით უფრო მომეწონება, რომ მივცე ის საბოლოო სახე, რაც ჩაფიქრებული მაქვს. ბოლომდე არასდროს ვიცი, რა იქნება ნახატის საბოლოო სახე, ყველაფერი მუშაობის პროცესში მოდის, მაგრამ ძირითად საწყისებს არ კარგავს. მონაწილეობა მაქვს მიღებული რამდენიმე ჯგუფურ გამოფენაში, ასევე, მქონდა სამი პერსონალური გამოფენა.
რაც შეეხება ტილოზე შესრულებულ ნახატებს – ჯერჯერობით, არცერთი არ გამიყიდია. არასოდეს მიფიქრია, დამეხატა ის, რაც მეტად გაიყიდებოდა, ჩემი ნახატები არის ჩემი ისტორიის მთავარი ფურცლები და მე ამ კვალს ვერ გავაუფერულებ.
როგორც ვიცი, კედელზე ხატვით ხართ დაკავებული – რომ გვითხრათ – რა მიზეზით დაინტერესდით ამ მიმართულებით?
ახალ გამოწვევებს და სიახლეებს ყოველთვის დიდი ინტერესით ვხვდები. კედელზე ხატვაც სიახლე იყო ჩემთვის და ძალიან საინტერესო აღმოჩნდა თვითონ პროცესი, მით უმეტეს, კედლის ზომაც საკმაოდ დიდი იყო იმ ტილოებთან შედარებით, რაზეც აქამდე მიმუშავია. ეს იყო ჩემი პირველი შეკვეთა. ამ ნახატმა დიდი მოწონება და ინტერესი გამიწვია როგორც ონლაინ, ასევე, რეალურად. მივიღე რამდენიმე შეკვეთა, რამაც მეტი სტიმული მომცა, უფრო მეტ კედელს მივცე ახალი სიცოცხლე.
კახეთში, სადაც მე ვცხოვრობ, ნაკლები ყურადღება ექცევა კედლის მხატვრობას. ნაკლებად აფასებენ ამ საქმეში ჩადებულ შრომას.
გარდა ამისა, ხელოვნების სხვა მიმართულებებით თუ ხართ დაინტერესებული?
როგორც საუბარში აღვნიშნე, ყოველთვის ვცდილობ, ახალი გამოწვევები მივიღო და ახალ სირთულეებს შევეჭიდო. ჩემი ახალი გამოწვევა არის ტატუს ხელოვნება, უკვე შევქმენი რამდენიმე ნამუშევარი და კიდევ ვაპირებ ამ სფეროში განვითარებას.
