თანამედროვე სამყაროში, რომელიც ტექნოლოგიების საუკუნეა, მოზარდებისთვისთვის დროის საუკეთესოდ გატარების საშუალება, უმეტესად, კომპიუტერული თამაშებია. თუმცა, 12 წლის თემო ხუჭუა, რომელსაც ახლა გაგაცნობთ, ხელნაკეთი კალათების მზადებით არის დაინტერესებული. ის უკვე 1 წელია, ამ საქმიანობას ეწევა. მისთვის ეს ხელსაქმე რთული არ აღმოჩნდა, რადგან აქვს ნიჭი, მარტივად და სრულყოფილად გაიმეორეს ერთხელ ნანახი. უფრო კონკრეტულად, „თბილისი თაიმსს“ თემოს და, მარიამ ხუჭუა ესაუბრა.
დამზადების იდეა გადაიღო მეზობლისგან, რომელიც პროფესიონალურ დონეზე ქსოვს. თემოც აკვირდებოდა მას, მოხიბლა ქსოვის ტექნიკამ და გულმოდგინედ აკვირდებოდა თითოეულ მოქმედებას. შემდეგ თავადაც სცადა და პირველივე ჯერზე გამოუვიდა.
აღნიშნულის შესწავლა არ გართულებია, რადგანაც მსგავსი საქმიანობები პატარაობიდანვე ეხერხებოდა. ერთი დაკვირვებით შეუძლია, იგივე რამ სრულყოფილად გაიმეოროს. ხელსაქმის მიმართულებით მისი ინტერესი საკმაოდ დიდია. „იუთუბზე“ ხშირად უყურებს მსგავს თემატიკაზე ვიდეოებს და თავისუფალ დროს იმეორებს კიდეც. სახლი სულ მისი ხელნაკეთობებითაა სავსე.
როგორია დაინტერესება მისი ნამუშევრების მიმართ?
რამდენიმე დღის წინ დავდე პოსტი და დავაწერე, რომ ამ მშვენიერ კალათებს ეს პატარა ბიჭი ამზადებდა, რამაც ხალხში აღტაცება გამოიწვია. ყველას უკვირს და უხარია, რომ ბავშვებში ჯერ კიდევ შემორჩა ხელობისადმი ინტერესი. მოგეხსენებათ, თანამედროვე თაობაში უმეტესობა კომპიუტერული თამაშებითაა დაკავებული, თემო კი თავისუფალ დროს კალათების ქსოვით ერთობა. რაც მთავარია, სკოლაშიც აქტიური მოსწავლეა და ეს ორმაგად გვახარებს, ორივე საქმეს ისე აკეთებს, რომ არცერთს ყურადღებას არ აკლებს.
