ყველა ამბავს, ყველა ისტორიას აქვს თავისი თარიღი. ლიკა შაინიძისთვის ისტორია, რომელიც მხატვრობასთან არის დაკავშირებული, 15 წლის ასაკიდან დაიწყო. ამ პერიოდიდან მოყოლებული, მისთვის პორტრეტების ხატვა განსაკუთრებულად საინტერესოა. ხატავს შავ და თეთრ ფერებში და გადმოსცემს ყველა საჭირო ემოციას. როგორც ლიკა ამბობს, ხშირად მისი ნამუშევრები იდუმალია და მათი ამოცნობა მარტივი არ გახლავთ. ხელოვანი „თბილისი თაიმსს“ ესაუბრა და აღნიშნა, თუ მხატვრობის რა მიმართულებებით არის დაინტერესებული.
პორტრეტი, პეიზაში, განსაკუთრებით – მარინისტული პეიზაჟები მომწონს. გამორჩეულად – პორტრეტების ხატვა მიზიდავს. ეს ყველაფერი პირველად სახეების ხატვით დავიწყე, დღემდე ახალ აღმოჩენებს ვაკეთებ და უფრო ვხვეწავ. ხატვით დავინტერესდი 15 წლიდან, მაშინდელი ნახატები ძალიან ბავშვური იყო, თუმცა, მაინც მომწონდა და ვიცოდი – რომ ერთ დღეს უკეთესად დავხატავდი.
ნამუშევრებს რისგან ქმნით?
ჩემი პორტრეტები, ძირითადად, ნახშირის ფანქრებითა და უბრალო ფანქრებით იქმნება, ვხატავ ზეთის საღებავებით და აკრილითაც, თუმცა, ყველაზე მეტად თავს კომფორტულად მაშინ ვგრძნობ, როდესაც ნახშირი მაქვს ხელში. პორტრეტებს ხშირად ფოტოგრაფების ფოტოებიდან ვარჩევ, თანაც ისეთებს, რომლებიც შეესაბამება იმ მომენტში ჩემს განწყობას და ხასიათს.
რა გამოარჩევს თქვენს ნამუშევრებს?
ვფიქრობ, ჩემი მშვიდი განწყობა და ხასიათი. ხშირად შეიძლება, ისეთი ნამუშევარი შევქმნა, სადაც ჩემი განცდებიცაა, თუმცა, ცოტა იდუმალიცაა, მისი ამოცნობა მარტივი არაა.
მათ შეკვეთით ამზადებთ?
უმეტესად კი, რადგან საჭიროა. თუმცა, ვცდილობ – ჩემთვისაც დავხატო განწყობის შესაბამისი პორტრეტი.
გარდა ამისა, რით ხართ დაინტერესებული?
ძალიან მაინტერესებს ქარგვა, ქსოვა, ქანდაკება, საიუველირო ნაკეთობების დამზადება. მაგრამ, ჯერჯერობით, ეს მხოლოდ ინტერესია – პრაქტიკაში ნაკლები გამოცდილება მაქვს. ვფიქრობ, მომავალში აუცილებლად შევისწავლი.
