ადამიანთა ფანტაზიას, შესაძლებლობებსა და იდეებს, უბრალიდ, საზღვარი არ აქვს. ჩვენი ყოველდღიურობაც არ მოულოდნელი ემოციებითაა დახუნძლული. წინასადღესასწაულო პერიოდი კიდევ უფრო დიდ გასაქანს აძლევს ფანტაზიას და ჯადოსნური იდეებიც ჩვენ წინაშე ხდება სრულყოფილი.
Artizanis – გახლავთ საქმიანობა, რომელიც თავიდან ბოლომდე განწყონაზეა დაფუძნებული. ნამუშევრების ავტორი ნათია ბოდოკიაა. ის ქმნის ნაძვის ხის სათამაშოებს, რომლებიც საკუთარი დიზაინით, სურნელითა და განსხვავებულობით ყველა ადამიანის გულს იგებს. უფრო დეტალურად, „თბილისი თაიმსს“ ნათია ესაუბრა.
როგორ შეიქმნა Artizanis-ი?
დაახლოებით, ერთი თვის წინ აღმოვაჩინე განსხვავებული სტრუქტურის თიხა, ბუმბულივით მსუბუქი. შევიძინე და გავაკეთე რამდენიმე ნივთი. ნახეს ჩემმა მეგობრებმა და ისეთი მოწონება დაიმსახურა, გავბედე და გამოვფინე სოციალურ ქსელში. ნამდვილად არ ველოდი ასეთ გამოხმაურებას. ეს ყველაფერი სულ რაღაც ორ კვირაში მოხდა. მაქვს შეკვეთები, ასევე, უკვე მზა ნამუშევრების შეძენა შესაძლებელია Artizanis გვერდიდან.
როგორ შეაფასებთ, რა გამოარჩევს თქვენს ნამუშევრებს?
ვფიქრობ, განსხვავებულია ჩემი სათამაშოები ნაძვის ხის სხვა სათამაშოებისგან თუნდაც იმიტომ, რომ კოლექციის უმეტესი ნაწილი და ჩემი საყვარელი სათამაშოებიც არის ნამცხვრები, რომლებიც ძალიან ჰგავს ნამდვილ საკონდიტრო ნაწარმს. პლუს ამას, ჩემი სათამაშოებს დარიჩინისა და ვანილის სასიამოვნო სურნელი აქვს, ესეც ერთგვარად ქმნის სადღესასწაულო განწყობას.
ყოველდღიურად იმდენი ნიჭიერი ადამიანის, ისეთ საოცარ ქმნილებას ვხვდებით, მაოცებს ადამიანის ფანტაზიის დიაპაზონი. ზოგჯერ ისეთ რამეს წავაწყდები, რომელიც თითქოს უმარტივესია, მაგრამ ამავდროულად საოცარი და მხოლოდ იმ ერთი ადამიანის ტვინში დაბადებული იდეაა, სწორედ ეს არის გენიალური.
გარდა ამისა, ხელოვნებასთან სხვა მხრივ თუ გქონიათ შეხება??
ეს არ არის ჩემი პირველი შეხება გამოყენებით ხელოვნებასთან. მაქვს ჩემი შეკერილი ნაძვის ხეები, დეკუპაჟით გაკეთებული ავეჯი. რამდენიმე წლის წინ პოლიმერული თიხის თოჯინების მასტერკლასი გავიარე არაჩვეულებრივ ქალბატონ ნანა ყაულაშვილთან. იმედი მაქვს, თოჯინებსაც მივუბრუნდები.
