Georgian Glamping Tent – საუცხოო შეთავაზებები მათთვის, ვისთვისაც ბუნებისა და კომფორტის ჰარმონიული შერწყმა განსაკუთრებული მნიშვნელობისაა. შალვა ბერიძემ აღნიშნული მიმართულებით საქმიანობა ჯერ კიდევ სტუდენტობის პერიოდიდან დაიწყო. უმაღლესი სასწავლების წარმატებით დასრულების შემდგომ, მან უკვე ნაყოფიერი ნაბიჯები გადადგა და დღეს უკვე საქართველოს მასშტაბით 30 ცალი გლემპინგ ობიექტი აქვს აშენებული. საკუთარ შეთავაზებებზე, გეგმებსა და ინტერესებზე შალვა „თბილისი თაიმსს“ ესაუბრა.
რამ განაპირობა თქვენი ინტერესი გლემპინგით?
ყველაფერი დაიწყო ბუნებისადმი ჩემი სიყვარულით, ლაშქრობით და კემპინგით, რომელიც შემდგომ გადაიზარდა უკვე პროფესიულ საქმიანობაში, ბაკალავრის ხარისხი ავიღე გრიგოლ რობაქიძის უნივერსიტეტში შემდეგი მიმართულებით – ბიზნესი და მართვა ტურიზმში, რაც ვფიქრობ, რომ წარმატებით დავამთავრე. მის მერე გახლავართ ტურიზმის სექტორში, რაც შეეხება ჩემი და გლემპინგის გადაკვეთას – ეს მოხდა პანდემიის დაწყებამდე. ჩამოვიტანე 3 ცალი გლემპინგის ტიპის დომი, რომელიც თიანეთის რაიონის სოფელ სიონში ავაშენეთ ჩვენი ხელით მე და ჩემ ძმებმა, ეს იყო ჩვენი პირველი პროექტი – ,,სიონი გლემპინგი”, რომლის დასრულების შემდეგ დიდი ინტერესი გაჩნდა მომხმარებელში და მომმართავდნენ თხოვნით, დავხმარებოდი მათ, რადგან უკვე გამოცდილება მქონდა ამ საკითხში, მოთხოვნიდან გამომდინარე – გაჩნდა იდეა. Georgian Glamping Tent – შევქმენი გვერდი, სადაც განთავსდა გლემპინგ კოტეჯის ტიპის დიზაინები, ინფორმაცია და ჩვენი აშენებული გლემპინგ ობიექტები.
რა სერვისებს სთავაზობთ დაინტერესებულ პირებს?
დღეის მდგომარეობით, საქართველოში 30 ცალი გლემპინგ ობიექტი მაქვს აშენებული და გაზაფხულიდან კიდევ მრავალი დაემატება საქართველოს ულამაზეს რეგიონებს. ჩვენი საქმიანობა მოიცავს მომხმარებლისთვის გლემპინგის შესახებ სწორი ინფორმაციის მიწოდებას, თუ რა დეტალები უნდა გაითვალისწინონ ადგილის შერჩევის დროს და მისი მშენებლობის პროცესში, ასევე, გვაქვს სერვისი, რომელსაც ვთავაზობთ მათ. ჩვენგან შეუძლიათ, შეიძინონ მხოლოდ გლემპინგ კოტეჯის კომპლექტი და ჩვენ ავუხსნათ მისი აწყობა-მონტაჟის წესები, თუ შეუძლიათ მათ ეს, რადგან დამატებითი ხარჯები აიცილონ თავიდან,
ასევე, გვაქვს ადგილზე მიტანა-მონტაჟის სერვისი და სრული მშენებლობის სერვისი, რომელიც გულისხმობს სრულ მშენებლობას – მიწის რელიეფის პროექტირებიდან დაწყებული და საბოლოო ვერსიამდე დასრულებული, რომ შეძლონ უკვე გაქირავებაში ჩაშვება.
როგორია ინტერესი საზოგადოების მხრიდან?
გლემპინგის მიმართ დიდი დაინტერესებაა და საკმაოდ მზარდი, რადგან მას არ სჭირდება გრძელვადიანი მშენებლობა. 1 ცალი სტანდარტული გლემპინგის დომის ასაწყობად კონკრეტულ ლოკაციაზე 1 დღე გვჭირდება, რაც მომხმარებლისთვის დიდი კომფორტია, მთავარია, სწორი ინფორმაცია მიაწოდო მომხმარებელს, ზოგადად, გლემპინგის და მისი ტექნიკური მახასიათებლების შესახებ.
აქვე მინდა, აღვნიშნო ასევე არასამთავრობო ორგანიზაციების ჩართულობა და მხარდაჭერა საგრანტო კონკურსებში რომელშიც გლემპინგი საკმაოდ დიდი პოპულარობით სარგებლობს და აფინანსებენ ბენეფიციარებს.
რა გეგმები გაქვთ სამომავლოდ?
დიდი გეგმები გვაქვს გლემპინგის მიმართულებით, წელს ჩვენ დავიწყეთ საქართველოში წარმოება და, დღეის მდგომარეობით, 10 ცალი გლემპინგ კოტეჯი ვაწარმოეთ ჩვენივე შექმნილი ახალი გლემპინგის დიზაინით. გვინდა, რომ ჩვენი ქართული, საქართველოში წარმოებული გლემპინგ კოტეჯები შემდეგი წლიდან საქართველოს ფარგლებს გარეთ გავიტანოთ.
ასევე, ჩვენ მომხმარებლებს მალე შევთავაზებთ ქსელურ პიარს, მარკეტინგს და მენეჯმენტს, რაც მათ ძალზე გაუადვილებს არსებული მიმართულებით მუშაობას.
