ჩურჩხელა, ტყლაპი, ჩირი და ა.შ. – ეს არის საქართველოსთვის დამახასიათებელი ნუგბარი, რომელსაც მომხმარებელს ძალიან ბევრი მწარმოებელი სთავაზობს. თუმცა, მათ შორის, არსებობენ გამორჩეულები, რომლებიც ზრუნავენ, რომ ეს ტკბილეული საზოგადოებამდე განსხვავებული ფორმითა და დიზაინით მიიტანონ. „ძაან“ სწორედ რომ ამ მიმართულებით საქმიანობს. კონკრეტულად, რა სახით აწვდის პროდუქტს და რით არის გამორჩეული მათი შეთავაზება – „თბილისი თაიმსს“ ნინო ბაჯაძე ესაუბრა.
„ჩვენი კომპანია 3 წელია, რაც არსებობს, მაგრამ „ძაან“ 2 თვეა, შეიქმნა. მანამდე სხვა სახელით ვარსებობდით. ვფიქრობ, საინტერესო და ძალიან ნიშანდობლივია ის სახელი, რასაც ჩვენ ვაწარმოებთ და ვაკეთებთ
ჩვენ მომხმარებელს ვთავაზობთ ქართულ ნუგბარს განსხვავებული დიზაინით. თხილი, ჩურჩხელა, ჩირი, ტყლაპი არახალი ამბავია, მაგრამ ის ვერსია და პრეზენტაცია, რასაც ჩვენ ვქმნით, ვგონებ, განსაკუთრებულია და ჩვენს ტრადიციულ ნუგბარს უფრო მიმზიდველს ქმნის. ესაა ტყლაპის და ჩირ-თხილეულისგან შექმნილი ნაძვი, გირლიანდა, ყვავილების თაიგული და ხუჭუჭა გემრიელი ყუთები“.
როგორც ნინო აღნიშნავს, „ძაან“ ყოველწლიურად სიახლეებს ქმნის, რაშიც ის და მისი ტყუპისცალი საკუთარი ოჯახებით არიან ჩართულები.
„ჩვენ ყოველ წელს ახალ-ახალ რაღაცებს ვქმით. ამ საქმეში. მე და ჩემი ტყუპისცალი ანა ჩვენი დიდი ოჯახებით ვართ ჩართული. ეს ერთი ადამიანისთვის ძალიან რთული და წარმოუდგენელია. ძალიან ბევრი წვრილმანი დეტალია, რომელსაც ბევრი დრო მიაქვს და ჩვენ ყველა, დიდიან-პატარიანად ვფუსფუსებთ, რომ განსაკუთრებული იყოს თითოეული დეტალი და ნამუშევარი.
ვფიქრობთ, ახალი გემოებიც შევქნათ და სხვა სიხალისე შევიტანოთ ჩვენს ნუგბარში“.
