რატომ გაიმეტა ყოფილმა სამხედრომ, 49 წლის ნოდარ ათუაშვილმა 4 მეზობელი და 1 პოლიციელი სასიკვდილოდ, რის შემდეგაც თავი მოიკლა – ამასთან დაკავშირებით ადგილობრივებს საუბარი უჭირთ. ისინი ამბობენ, რომ დაახლოებით 1 საათის განმავლობაში ინტენსიური სროლის ხმა ისმოდა. ადგილზე მისულებს კი რამდენიმე ადამიანი დახვდათ გარდაცვლილი.
როგორც ერთ-ერთი დაჭრილის დედა ამბობს, მისი შვილი ადგილზე სროლის ხმაზე გავიდა, სადაც მეზობლები უკვე გარდაცვლილი დახვდა და სწორედ ამ დროს მიიღო ფეხის არეში დაზიანებები. ქალის თქმით, დაჭრილები და დაღუპულები ადგილობრივი მაცხოვრებლები არიან.
“დაჭრილია ჩემი შვილი, ფეხში. უცაბედად ატყდა სროლა, რომ გავიხედეთ აივნიდან, ჩემი შვილი გაიქცა საშველად. მივიდა ახლოს და ჩემს შვილსაც დაუწყეს სროლა. ერთადერთი ის ვიცი რომ სროლა ატყდა, ადამიანები დახოცა და ჩემი შვილი დაჭრილია. გარდაცვლილები ადგილობრივები, ჩემი შვილის ამხანაგები არიან. მე თვითონდავინახე რომ 3 ადამიანი ძირს იყო დავარდნილი. ჩაკეტილები ვიყავით და სროლის ხმა კარგა ხანი გვესმოდა,” – ამბობს ერთ-ერთი დაჭრილის დედა.
ადგილობრივები ასევე ამბობენ, რომ ადგილზე გაიგეს ხელყუმბარის აფეთქების ხმაც. მათი ინფორმაციით, პოლიციელი ერთ-ერთ მოქალაქეს გადაეფარა, რა დროსაც სასიკვდილო დაზიანება მიიღო.
49 წლის ნოდარ ათუაშვილს მონაწილეობა აქვს მიღებული არაერთ საერთაშორისო მისიაში, მათ შორის იგი იბრძოდა ავღანეთშიც, უკანასკნელი 5 წლის მანძილზე იგი ცხოვრობდა სწორედ იმ კორპუსში, სადაც შემთხვევა მოხდა. მეზობლების ინფორმაციით, ის ცხოვრობდა მარტო, თუმცა შემთხვევის დროს იმყოფებოდა შვილთან ერთად, რომელმაც თავდამსხმელი მამისგან შეძლო თავის დაღწევა. იგი ახლა სამართალდამცველების კითხვებს პასუხობს.
შინაგან საქმეთა სამინისტროში მიმდინარეობს ყველა იმ პირის დაკითხვა, რომელიც მომხდარ ფაქტთან არის შემხებლობაში.
