გურჯაანის მუნიციპალიტეტის სოფელ ველისციხეში, 31 წლის კაცმა თანასოფლელები ცეცხლსასროლი იარაღიდან რამდენიმე გასროლით მოკლა.
გიორგი ფარსადანიშვილმა, 71 წლის მეზობლებს, გივი კობერიძესა და მერაბ ზალუაშვილს სასიკვდილო ჭრილობები იმ დროს მიაყენა, როცა ორივე მათგანი სოფლის ცენტრში იმყოფებოდა.
თანასოფლელების ვერსიით, შემთხვევამდე რამდენიმე საათით ადრე ბრალდებულსა და ერთ-ერთ მოკლულს შორის, ფიზიკური და სიტყვიერი დაპირისპირება მოხდა.
ცეცხლსასროლი იარაღიდან გასროლის შემდეგ, ორივე მამაკაცი სასწრაფო – სამედიცინო დახმარების ბრიგადის მისვლამდე, ადგილზე გარდაიცვალა.
შემთხვევის ადგილი ამ დრომდე პოლიციის ყვითელი ლენტით არის შემოსაზღვრული და საგამოძიებო მოქმედებები მიმდინარეობს.
